Трамп Япония, Филиппин ва Индонезия билан савдо битимларини тузди

АҚШ президенти Дональд Трамп 22 июль куни Япония, Филиппин ва Индонезия билан савдо битимлари тузилганини маълум қилди. Бу ҳақда CNN хабар берди.

Трампнинг Япония билан савдо шартномасини тузиши узоқ вақтдан бери кутилаётган эди. Унга кўра, битим доирасида Қўшма Штатларга экспорт қилинадиган япон товарларига 15 фоиз бож тайинланади. Шу ўринда Япония АҚШга 550 миллиард доллар сармоя киритади.

“Биз ҳозиргина Япония билан улкан келишувни амалга оширдик. Эҳтимол, бу энг йирик келишувдир. Бунда АҚШ фойданинг 90 фоизига эгалик қилади. Ушбу битим юз минглаб иш ўринларини яратади — бунақаси ҳеч қачон бўлмаган. Энг муҳими, Япония билан автомобиль, юк машиналари, гуруч ва бошқа қишлоқ хўжалиги маҳсулотлари билан савдо қилиш имкони яратилади. У Қўшма Штатларга 15 фоиз миқдорида божлар тўлайди”, деб ёзган Трамп Truth Socialъда.

Япония бош вазири Шигеру Ишиба Трампнинг баёнотига жавоб берар экан, ҳукумат битим тафсилотларини эҳтиёткорлик билан ўрганишини ва зарурат туғилганда АҚШ президенти билан телефон орқали ёки юзма-юз учрашув ўтказишини билдирган. Аммо Трамп каби, вазир ҳам аниқ тафсилотларни оммага очиқламаган.

Япония Қўшма Штатларнинг бешинчи йирик импорт манбаи ҳисобланади. У 2024 йили АҚШга 148 миллиард долларлик маҳсулот экспорт қилган. Автомобиллар, автомобиль эҳтиёт қисмлари, қишлоқ хўжалиги ва қурилиш машиналари америкаликлар Япониядан кўп сотиб оладиган маҳсулотлар қаторига кирарди.

Филиппин билан савдо битими ва Индонезия билан келишув шартлари

Трамп 22 июль куни Филиппин президенти Кичик Фердинанд Маркос билан савдо келишувига эришилганини маълум қилган. Шу куни президент Индонезия билан ҳам савдо битимининг аниқ шартларини ошкор қилган.

Иккала келишувда ҳам АҚШ ушбу давлатлардан импорт қиладиган товарларга 19 фоизлик божлар белгиланиши кўзда тутилган. Шу билан бирга, Қўшма Штатлар бу икки давлатга юборадиган товарларига ҳеч қандай бож солинмайди.

Дональд Трамп Филиппин билан келишувни 22 июль куни Оқ уйда президент Кичик Фердинанд Маркос билан учрашганидан сўнг эълон қилган.

“Учрашув ажойиб ўтди ва биз савдо битимини якунладик” деб ёзган Трамп ижтимоий тармоқдаги саҳифасида.

Трамп жаҳон мамлакатларининг деярли барчасига савдо тарифларини ўрнатаётгани сир эмас. Жумладан, у август ойидан бошлаб мис импорти учун ҳам 50 фоизлик бож кучга киришини маълум қилган. Бундан ташқари, Трамп 1 августгача мамлакатларни битим тузишга ундаб, агар шартнома тузилмаса, уларга жуда юқори тарифлар жорий этилиши билан таҳдид қилиб келмоқда.