Бирлашган Миллатлар Ташкилотининг Женевадаги штаб-квартирасида бўлиб ўтган AI For Good саммитида қирол Чарльз III нинг AI-Dа робот-гуманоиди томонидан чизилган портрети тақдим этилди. Бу ҳақда Sky Newsʼга таяниб “Правила жизни” хабар бермоқда.
Алгоритҳм Кинг деб номланган картина мойбўёқда чизилган бўлиб, роботнинг “кўзи”га ўрнатилган камералардан олинган тасвирлар асосида яратилган. AI-Dа суратни қўллари ўрнига ўрнатилган бионик протезлар билан чизган.
Ташқи кўринишидан аёлга ўхшаб кетадиган одамсимон робот AI-Dа 2019 йилда яратилган ва 1842 йилда ҳисоблаш машинасининг тавсифини яратган ҳамда ушбу машина учун дунёдаги биринчи дастурни тузган инглиз математиги Ада Лавлейс шарафига номланган.
Мулоқот учун сунъий интеллект тилининг такомиллаштирилган моделидан фойдаланадиган AI-Dа роботи ҳам саммитдаги иштироки ҳақидаги таассуротлари билан ўртоқлашди: “БМТда, технологиялар ва маданият келажагини шакллантирувчилар даврасида ушбу ажойиб тадбирнинг бир қисми бўлиш мен учун катта шараф. Қирол Чарльз III нинг портретини тақдим этишим шунчаки ижодий ҳаракат эмас, балки сунъий интеллектнинг жамиятимиздаги ўрни ўзгараётгани ҳақидаги баёнот ва сунъий интеллект маданий ландшафтни қандай шакллантираётгани борасида мулоҳаза юритишдир”.
Ўз навбатида, Жаҳон савдо ташкилоти ва БМТнинг Женевадаги доимий вакили, элчи Саймон Менли “AI-Dа шунчаки технологик мўжиза эмас, балки маданий мулоқот мавзусидир”, деди. У, шунингдек, Британия инновацияларидан ҳайратда эканлигини ва янги технологиялар санъат, ахлоқ ва ўзига хослик бўйича глобал мулоқотга таъсир кўрсатишига умид билдирди.
Изоҳ (0)