Биргаликда 12 та фильмдаги рол: Голливуднинг энг машҳур актёрлар жуфтлиги

Голливуднинг мазкур актёрлари экранда яхши шерик, қадрдон дўст ва ашаддий душман образларини моҳирона яратиб, томошабинлар қалбидан жой олган.

Ал Пачино ва Роберт Де Ниро

• 4 та ҳамкорликдаги фильм: “Чўқинтирган ота 2”, “Тўқнашув”, “Ўлдириш ҳуқуқи”, “Ирландиялик”

Ал Пачино ва Роберт Де Ниро 70 йиллар Америка киносининг афсонавий сиймолари ва жиноий жанрдаги фильмларнинг доимий актёрларидир. Айнан шу сабабли Мартин Скорсезе уларни “Ирландиялик” фильмида бош ролларга таклиф қилган.

Бироқ Ал Пачино ва Де Ниро биринчи марта анча олдин бирга суратга тушган — бу “Чўқинтирган ота” фильмининг давоми эди. Давомида Ал Пачино мафия раҳбари Витонинг ўғли Майкл Корлеоне ролига қайтган бўлса, Де Ниро ёш Витони ижро этган.

Дуэтнинг динамикаси Майкл Маннинг “Шиддатли тўқнашув” фильмида янада ўсди. У асабий, гиперактив ва тушкун терговчи (Ал Пачино) билан камгап ва хавфли ўғри (Де Ниро) ўртасидаги зиддият ҳақида ҳикоя қилади. Фильмда актёрларнинг биргаликдаги саҳналари деярли бўлмаса-да, иккаласи ҳам бир-бирининг эпизодларида кўринмас тарзда иштирок этади.

Райан Гослинг ва Эмма Стоун

• 3 та ҳамкорликдаги фильм: “Аҳмоқона севги”, “Гангстерлар овчилари”, “Ла-Ла Ленд”

Райан Гослинг ва Эмма Стоун илк бор “Аҳмоқона севги” номли романтик комедия фильмини суратга олиш чоғида танишган. Улар ушбу фильмда севишган жуфтликни ижро этган.

Кўп ўтмай, иккаласига яна севишганлар ролини ўйнаш таклиф этилди, бу сафар “Гангстерлар овчилари” номли триллерда. Уларнинг ҳамкорлиги Демиэн Шазелнинг “Ла-Ла Ленд” мусиқали фильмида давом этди.

Жонни Депп ва Ҳелена Бонем Картер

• 7 та ҳамкорликдаги фильм: “Келин жасади”, “Чарли ва шоколад фабрикаси”, “Флит-стрит кўчасидаги қонхўр сартарош Суини Тодд”, “Ёлғиз рейнжер”, “Алиса ажойиботлар мамлакатида 2”, “Қора соялар”

Бу жуфтлик режиссёр Тим Бёртоннинг севимли актёрларидир. Ҳелена Бонем Картер 2001 йилдан 2014 йилгача унинг деярли барча фильмларида рол ижро этди.

Режиссёр ва Жонни Депп ўртасидаги ҳамкорлик тарихи ундан ҳам олдинроқ бошланган. Актёр биринчи марта Бёртоннинг “Эдвард қайчиқўл” фильмида рол ўйнаганди. Ўшандан бери Депп Бёртоннинг доимий актёрига айланди.

Пенелопа Круз ва Ҳавер Бардем

• 8 та ҳамкорликдаги фильм: “Ветчина, ветчина”, “Вики, Кристина, Барселона”, “Маслаҳатчи”, “Ўтмиш лабиринтлари”, “Тирик тана”, “Севгидан ҳам ортиқ”, “Севги хатарлари”, “Худодан дарак йўқ”

Ҳавер Бардем ва Пенелопа Круз “Ветчина, ветчина” фильмини суратга олиш пайтида танишган. Бу 18 ёшли Крузнинг кинодаги биринчи роли эди. Сюжет севги тўртбурчагига бағишланган бўлиб, шафқатсиз жанжал билан якунланади. Фильм 1992 йилги Венеция кинофестивалида катта шов-шувга сабаб бўлди ва Круз билан Бардемни Испаниядан чиққан энг ёрқин актёрлар жуфтлигига айлантирди. 2010 йилда улар турмуш қуришди ва ҳозирда икки фарзандни тарбиялашмоқда, шунингдек, баъзан бирга фильмларда ҳам суратга тушишади.

Метт Деймон ва Бен Аффлек

• 9 та биргаликдаги фильм: “Мўжизалар майдони”, “Мактаб алоқалари”, “Заковатли Уилл Ҳантинг”, “Эми ортидан қувиш”, “Догма”, “Жей ва Боб қарши зарба беради”, “Жей ва Боб: Қайта ишга тушириш”, “Сўнгги дуэл”, “Аир: Буюк сакраш”

Метт Деймон ва Бен Аффлек мактабдаёқ танишган. Уларнинг оналари дўст бўлгани сабабли болалар кўпинча бирга вақт ўтказишарди. Уларни актёрликка бўлган қизиқиш ҳам бирлаштирган — иккаласи ҳам Кембриж давлат ўрта мактабида ўқиган ва у ердаги драма тўгарагига қатнашган.

Мактабни тугатгач, дўстларнинг йўллари қисқа муддатга ажралган — улар турли университетларга кирган. Деймон гуманитар факультет талабаси бўлиб, биринчи курсда “Заковатли Уилл Ҳантинг” фильми учун сценарий ёза бошлаган. Вақт ўтиб, у Аффлекни ҳам бу ишга қўшган.

Улар сценарийни ёзиб тугатгач, уни Castle Rock Entertainment компаниясига сотишган, бироқ компания фильмни суратга олишдан воз кечган. Шунда Деймон таниш режиссёр Кевин Смитга илтимос қилиб, сценарийни Мирамах Фильмсъдаги Ҳарви Вайнштейнга етказган.

Продюсер ғояни маъқуллаган ва ҳатто Деймон билан Аффлекни бош ролларга тасдиқлаган. Шундай қилиб, дўстларнинг карьерасига туртки берган ва уларнинг актёрлик истеъдодини намойиш этган култ фильм дунёга келган.

Бен Стиллер ва Оуэн Уилсон

• 12 та биргаликдаги фильм: “Кабелчи”, “Абадий ярим тун”, “Ота-оналар билан танишув” (3 қисм), “Намунали эркак” (2 қисм), “Тененбаум оиласи”, “Старски ва Хатч”, “Музейдаги тун” (3 қисм)

Бен Стиллер ва Оуэн Уилсон 2000—2010 йилларнинг машҳур комедия жуфтлиги ҳисобланади. Улар “Кабелчи” фильмини суратга олиш пайтида танишган. Ўша вақтда Стиллер аллақачон таниқли Голливуд актёри ва эндигина режиссёрликни бошлаганди. Уилсон эса кинодаги карьерасини яқинда бошлаган ва Уэс Андерсоннинг “Бутилка ракета” номли биринчи фильмида рол ижро этганди. Стиллерга бу иш жуда маъқул келиб, у Уилсонни ўз фильмидаги кичик ролга таклиф қилади.

Кейинчалик актёрлар шунчалик дўстлашиб кетдиларки, Стиллер Уилсонни ўзининг бошқа лойиҳаларига ҳам таклиф эта бошлайди. Гиёҳвандлик муаммолари ҳақидаги “Абадий ярим тун” номли драмада улар гиёҳванд дўстлар ролини ижро этишади. “Ота-оналар билан танишув” фильмида эса Уилсонга Бен Стиллер қаҳрамони хотинининг собиқ йигити ролини ўйнаш насиб этади. Жуфтликнинг ҳақиқий юлдузли онлари “Намунали эркак” фильмидан сўнг келади.