Украина Трамп учун навбатдаги Афғонистонга айланиши мумкин — Bloomberg

Украинадаги уруш ташқи кўринишидан Афғонистондаги 20 йиллик можарога ўхшамаслиги мумкин. Бироқ у АҚШ президенти Дональд Трамп учун ўхшаш хавф ва сиёсий жавобгарликни юзага келтирмоқда. Бу ҳақда Bloomberg хабар берди.

Маълум қилинишича, Трамп урушни тезда тугатишга ваъда берган, бироқ бу вазифани бажариш қийин бўлиб бормоқда. Можаро чўзилган сайин АҚШ президенти унга масъул бўлиб қолишдан қўрқади. Сабаби кўпчилик уни Путинни тўхтатиш учун етарлича ҳаракат қилмаганликда айблаши мумкин.

Трамп олти ойдан бери АҚШ сиёсатини бошқармоқда, уруш эса давом этмоқда. Энди бу унинг масъулиятига айланган. Агар Путин унинг даврида ғалаба қозонса, Трамп жуда қаттиқ танқидга учраши мумкин, дейди АҚШнинг Украинадаги собиқ элчиси, ҳозирда Атлантика кенгашида ишлаётган Жон Ҳербст. 

Афғонистон билан таққослаш тўлиқ мос келмаслиги мумкин. Сабаби у ерда АҚШ максимум 100 минг аскарга эга эди ва 20 йиллик уруш давомида 2500 га яқин америкалик ҳарбий ҳалок бўлганди. Охир-оқибат, АҚШ “Толибон” фаолиятини тўхтата олмади. Трамп эса бунда ҳозиргача собиқ президент Жо Байденни айблаб келади.

Украина уруши эса тўртинчи йилига кирган. АҚШ унда асосан ҳарбий ёрдам ва қурол етказиш орқали иштирок этмоқда. Аксар таҳлилчиларга кўра, на Украина ҳукумати қулаши, на Россия бутун мамлакатни босиб олиши эҳтимоли мавжуд. Шунга қарамай, Трамп ўзининг бу можаро учун жавобгар эмаслигини таъкидлашда давом этмоқда. НАТО бош котиби Марк Рютте билан учрашувда у шундай деган эди:

Бу менинг урушим эмас — бу Байденнинг уруши. Мен сизларни бу урушдан чиқаришга ҳаракат қиляпман.

АҚШ раҳбарига қарши босим кучаймоқда

Трамп қайта сайланишидан олдин Washington Post шарҳловчиси Марк Тиссен унга мурожаат қилиб, шундай деган эди:

Агар сиз Кобулнинг қулагани учун Байденни айбламоқчи бўлсангиз, Киев қулашига сиз ҳам айбдор бўлиб қолмаслигингиз учун ҳарбий ёрдам юборинг, деган у.

2024 йил февраль ойида Халқаро муносабатлар кенгаши президенти Майкл Фроман ҳам Трампнинг урушни тез якунлаш истагини кескин танқид қилган. У бундай шошилинч сулҳ “катта хато” бўлишини айтганди.

Агар “Толибон” Кобулда америкалик Humvee ҳарбий машиналарида юриши ёмон кўринган бўлса, Харьков кўчаларида Россиянинг Абрамс танкларида юришини тасаввур қилинг, деган у.

Фроман шу тариқа Россия кучлари ғалаба қозонса, АҚШ етказиб берган замонавий ҳарбий техникаларни қўлга киритиши эҳтимолидан огоҳлантирган.