Японияда 20 июль куни парламент сайловлари бўлиб ўтди. Унда ҳукмрон Либерал демократик партия парламентнинг юқори палатасида кўплаб ўринларни йўқотган бўлса-да, бош вазир Шигеру Ишиба истеъфога чиқмаслигини маълум қилди. Бу ҳақда BBC хабар берди.
Овоз бериш натижалари Ишиба ҳукумати тақдирини тўғридан-тўғри ҳал қилмайди. Аммо бош вазир октябрь ойида парламентнинг қуйи палатаси назоратини аллақачон йўқотганди. Шу сабабли эндиликда Ишибанинг ҳукуматига босим янада кучайиши тахмин қилинмоқда.
Сайлов натижалари эълон қилинганидан кейин сўзга чиққан бош вазир эътиборини эндиликда АҚШ билан савдо музокараларига қаратишини билдирган.
“АҚШ билан бўлаётган жуда муҳим савдо бўйича музокараларни бузиш хато бўлади. Айни пайтда иқтисодий инфляция, нархлар ошиши ва 1 августга белгиланган савдо божларини олдини олиш зарур. Мен лавозимимда қоламан ва мавжуд муаммоларни ҳал қилиш учун бор кучимни сарфлайман. Қўшма Штатлар президенти Дональд Трамп билан тўғридан-тўғри мулоқот қилишни режалаштирдим”, деган Ишиба.
2024 йил 27 октябрда ҳам Японияда парламент сайловлари бўлиб ўтган. Унда Либерал-демократик партия ва унинг иттифоқчиси Комеито партияси парламентдаги кўпчилик овозни бой берганди. Хусусан, ЛДП 191 та ўринни, Комеито эса 24 та ўринни эгаллаган. Бу кўрсаткичлар 2021 йилда мос равишда 259 ва 32 та ўринни ташкил этганди.
Изоҳ (0)