Жиноят ишлари бўйича Шайхонтоҳур туман судида бугун, 16 июнь куни Қобил Дусовга (1984 йилда Самарқанд вилоятида туғилган, муқаддам судланган) оид жиноят ишини кўриб чиқиш бўйича очиқ суд жараёни якунланиб, суд ҳукми эълон қилинди. Бу ҳақда Олий суд матбуот хизмати хабар берди.
Маълум қилинишича, ушбу жиноят иши жиноят ишлари бўйича Шайхонтоҳур туман судининг судьяси А. Мирзаханов раислигида биринчи инстанцияда кўриб чиқилди.
Суд ҳукмига мувофиқ Қ. Дусов 5 нафар жабрланувчига (Мактабгача ва мактаб таълими вазирлиги, Навоий вилояти мактабгача ва мактаб таълими бошқармаси мутасадди ва масъуллари, Чирчиқ шаҳри ИИБ Пробация бўлими катта инспектори) нисбатан Жиноят кодексининг 139-моддаси (туҳмат) 3-қисми “а” банди, 140-моддаси (ҳақорат қилиш) 3-қисми “а” банди ва 237-моддаси (ёлғон хабар бериш) 2-қисми “г” бандида назарда тутилган жиноятларни содир этганликда айбли деб топилди.
Қ. Дусовга Жиноят кодексининг 59, 61-моддаларига асосан 5 йил 1 ой озодликдан маҳрум қилиш жазоси, Жиноят кодексининг 59-моддаси 8-қисми тартибида мазкур ҳукм билан тайинланган жазога жиноят ишлари бўйича Арнасой туман судининг 2025 йил 24 февралдаги ҳукми билан тайинланган жазони қисман қўшиш йўли билан ўташ учун узил-кесил 5 йил 2 ой озодликдан маҳрум қилиш жазоси тайинланди.
Тайинланган жазони умумий тартибли колонияларда ўташ белгиланди.
Қ. Дусов томонидан Facebook’даги “Кабул Дусов” номли профил ҳамда Telegram’даги “Кобул Дусов/РАСМИЙ КАНАЛ/” номли канал фаолияти тўхтатилиб, блокланиши белгиланди.
Мазкур жиноят иши бўйича манфаатдор тарафларга етказилган моддий ва маънавий зарарларни ундириш юзасидан фуқаролик суд ишларини юритиш тартибида судга мурожаат қилиш ҳуқуқлари мавжудлиги тушунтирилди.
Биринчи инстанция судининг ҳукми устидан тарафлар қонунда белгиланган тартиб ва муддатда Тошкент шаҳар судининг жиноят ишлари бўйича судлов ҳайъатига апелляция/кассация тартибида шикоят бериш ва протест келтиришга ҳақлилиги маълум қилинади.
Қобил Дусов иши
Собиқ депутат, ижтимоий тармоқ фаоли Қобил Дусов Чилонзор туман судининг 2024 йил 22 ноябрдаги ҳукмига мувофиқ Жиноят кодексининг 140-моддаси (ҳақорат қилиш) 3-қисми “а” бандида назарда тутилган жиноятни содир этганликда айбли деб топилиб, унга 1 йил муддатга озодликни чеклаш жазоси тайинланганди.
Яшнобод туман ИИО ФМБ Пробация бўлими томонидан судга Қобил Дусовнинг ўталмай қолган 11 ой 2 кун озодликдан чеклаш жазосини шу муддатга озодликдан маҳрум қилиш жазосига алмаштиришни сўраб тақдимнома киритилганди. Тақдимномага кўра, Дусов белгиланган чекловларга риоя қилмаган ва жазо шартларини қасддан бузган.
Жиноят кодексининг 48-1-моддасига (озодликни чеклаш) асосан Дусовга сутканинг муайян вақти, яъни кеч соат 21:00 дан эрталабки соат 07:00 га қадар яшаш жойидан чиқиш чекланиши ва унга қўшимча интернетдан фойдаланмаслик, оммавий ва бошқа тадбирлар ўтказишда иштирок этмаслик, ҳар ойда бир маротаба яшаш жойи бўйича ИИО ФМБ Пробация бўлимидан рўйхатдан ўтиб туриш ҳамда маҳкумларни назорат қилувчи органнинг розилигисиз яшаш жойини ўзгартирмаслик каби тақиқлар юкланиши белгиланганди.
Бироқ у белгиланган тартибни бузган ва 2025 йил 11 январь куни Яшнобод тумани ИИО ФМБ Пробация бўлимига чақиртирилиб, огоҳлантириш тарзидаги интизомий жазога тортилган. Дусовга 24 январь куни ИИВ ТҚД Киберхавфсизлик томонидан яна огоҳлантириш интизомий жазоси эълон қилинган бўлса-да, ундан олдин ҳам, ундан кейин ҳам интернетдан фаол фойдаланиб келгани аниқланган. 24 январда Қобил Дусовга нисбатан қўлланилган озодликни чеклаш жазоси 11 ой 2 кунлик озодликдан маҳрум қилиш жазоси билан алмаштирилган.
2025 йил 24 февралда жиноят ишлари бўйича Арнасой туман судида Қобил Дусовга оид жиноят ишини кўриб чиқиш бўйича очиқ суд жараёни якунланди. У 4 нафар жабрланувчига (Жиззах вилояти мактабгача ва мактаб таълими бошқармаси тизими масъуллари Н.Ялгашева, О.Камолова, Ш.Ҳасанова ва С.Суярова) Жиноят кодексининг 139-моддаси 3-қисми “а” банди (оғир ёки ўта оғир жиноят содир этишда айблаб туҳмат қилиш) ва 140-моддаси 3-қисми “а” бандида (жабрланувчини ўз хизмат ёки фуқаролик бурчини бажариши муносабати билан боғлиқ ҳолда ҳақорат қилиш) назарда тутилган жиноятларни содир этганликда айбли деб топилди.
Суд ҳукми билан унга 1 йил 2 ой муддатга озодликдан маҳрум қилиш жазоси тайинланди ва жазони манзил-колонияларда ўташ белгиланди.
Шунингдек, Тошкент шаҳар суди жиноят ишлари бўйича судлов ҳайъати апелляция инстанциясининг 2025 йил 11 мартдаги ажрими билан Қобил Дусовга нисбатан жиноят ишлари бўйича Яшнобод туман судининг 2025 йил 24 январдаги ажрими ўзгаришсиз қолдирилганди.
Изоҳ (0)