Ўзбек эстрадасининг узоқ йиллик вакили, асл исми Илҳом Йўлчиев бўлган хонанда DJ Piligrim 10 июнь куни 49 ёшни қаршилади. Шу муносабат билан унинг ҳаёти ва ижодий фаолиятига назар соламиз.
DJ Piligrim санъатга кириб келганига 27 йил бўлди
Илҳом Йўлчиев 1976 йилда Тошкент шаҳрида туғилган. У болалигида этикдўзлик қилиб, бозорда чарм курткалар сотган.
— Чилонзорда ўсганман. Отамни кўрмаганман. Унинг йўқлиги, бўшлиқни спорт билан тўлдирганман. Болалигимда фазогир бўлишни орзу қилардим. Аммо онам немис тили ўқитувчиси бўлишимни истади. Мен институтга кирган пайтда беш йиллик таълим ва бакалаврга қўшиб магистр даражасини ҳам беришарди. 1998 йили немис тили ўқитувчиси деб ёзилган дипломни олганман. Аммо бу соҳада ишлашни истамадим. Чунки қизиқиш бўлмаган, диплом эса ҳалигача онамнинг шкафида чиройли идишлар қаторида туради. У ерда менинг дипломимдан ташқари яна иккитаси бор. Сабабини билмайман-у, бизда бугунги кун билан эмас, келажак билан яшалади. Бу диплом ҳам гўё келажак учун олиб қўйилгандек. Фойдаланиладими-йўқми, буни Худо билади, дейди хонанда Илҳом Йўлчиев.
“Тахаллусим бир кечада пайдо бўлган”
Хонанда ноодатий тахаллуси бир кечада тасодифан хаёлига келган ва бир муддат тунги клубда ишлаган.
— 1998 йили дижейларнинг фестивали бўлган. Унда Best DJ сўзларининг қисқартмасидан фойдаланмоқчи эдим. Аммо ташкилотчиларга бу ёқмади. “Эрталабгача вақт бор, тонгда афишаларни чоп этишга юборишимиз керак. Ўзинг учун яхшироқ ном топ”, дейишган. Хаёл суриб, кинога кўзим тушиб қолган. Ундаги диалогда piligrim сўзи ишлатилганди. Изласам, бу сўз дарвеш маъносини англатар экан. Ана, тахаллус топилди, деб DJ Piligrim бўлишни маъқул кўрганман, дейди хонанда.
“Мақсадим дуэтдошларимнинг машҳурлигидан фойдаланиш бўлган”
Илҳом Йўлчиев шу кунгача жуда кўп машҳур хонандалар билан дуэт куйлаган. Хонанда улардан “зина” сифатида фойдаланганини яширмайди.
— Менда продюсер ёки ҳомий бўлмаган. Ҳамиша ўз фаолиятимни ўзим молиялаштирганман. Машҳур хонандалар билан дуэт куйлашимнинг асосий сабаби эса уларнинг машҳурлигидан фойдаланиб кўтарилиш бўлган. Бу борада эгоист эканлигимни тан оламан. Дуэтларнинг деярли ҳаммаси яхши чиққан ва одамларга ёққан. Ҳозир ўзим ҳам ёш хонандаларни қўллаб-қувватлашга ҳаракат қиламан. Дуэт айтган, ҳатто қўшиқ яратиб берган пайтларим ҳам кўп бўлади. “Кўк чой” гуруҳи билан ишладик, уларнинг қўшиқлари одамларга ёқяпти, дейди DJ Piligrim.
У муаллифлик қўшиқлари билан бир қаторда, ўзбек шоу-бизнесининг машҳур юлдузлари — Лола, Севара Назархон ва Юлдуз Усмонова билан ҳамкорликдаги дуэтлари билан ҳам машҳур.
DJ Piligrim дуэтдоши хонанда Райҳоннинг устидан ИИБга шикоят қилган
Райҳон бу ҳақида Instagramъдаги саҳифасида ёзиб қолдирган.
Райҳоннинг сўзларига кўра, Учтепа тумани Ички ишлар бўлимидан унга қўнғироқ бўлган ва унда DJ Piligrim 17 март куни YouTubeъдаги интервьюда шахсий ҳақоратларга учраганини иддао қилган. Райҳон вазиятга изоҳ берар экан, интервьюда айтилган гаплар аввалроқ режалаштирилган ижодий ҳамкорлик доирасида юзага келганини таъкидлади. Райҳоннинг айтишича, у ва DJ Piligrim янги “Муҳаббат” қўшиғи устида биргаликда ишлаган, харажатларнинг барчасини эса Райҳон ўз зиммасига олган. Бироқ келишувга зид равишда, қўшиқ премераси DJ Piligrim’нинг каналларида радиолардан олдин тарқатилган, бу эса режалаштирилган эфирларни бекор қилинишига сабаб бўлган.
— Аввалига хафа бўлдим, кейин эса аҳамият қилмадим, сабаби мухлислар эшитишса бўлди деб қўйдим. Қаерда эшитгансизлар бундай тубанликни? Интервьюда у ҳақида нима деганимни кўриб ва бу воқеани ўқиб, ўзингиз хулоса қилинг. У одамга мени ҳеч қандай гапим йўқ ва мен бу инсонга орамиздан нима гаплар ўтганига қарамай фақат яхшилик тилайман, дейди Райҳон.
“Санъат туфайли касалликка чалиниб, уни ёга орқали даволаганман”
Хонанда бир муддат Ҳиндистонда яшаб, ўша ерда соғлиғи билан боғлиқ муаммоларга даво топган.
— 2016 йил белим қаттиқ оғриган ва эгилолмай қолганман. Текширтирсам, умуртқада нерв томирларининг қисилиши ва кучли шамоллаши ташхисини қўйишган. Унинг пайдо бўлишига эса узоқ вақт машинада ўтириш сабаб экан. Ҳақиқатан ҳам, гастрол сафарларига кетаётганда бир неча соат қимир этмай машинада ҳаракатланамиз. Унинг устига, ишим компьютер билан боғлиқ бўлгани ҳам саломатлигимга салбий таъсир этибди. Шундан кейин Ҳиндистонга бориб яшадим. У ерда ёгани ўргандим. Ҳозир ҳам ёга машғулотлари билан мунтазам шуғулланаман. Агар кимдир шу касаллик билан оғриётган бўлса, албатта, ёга билан шуғулланишни тавсия қиламан. Чунки саломатлигим айнан ёга сабаб яхшиланди, дейди хонанда.
“Муҳаббатсиз яшай олмадим, ҳозир бўйдоқман”
Хонанда омадсиз икки никоҳи ва иккинчи турмушидан ҳам ажрашгани ҳақида яширмайди.
DJ Piligrim икки марта турмуш қурган ва икки марта ажрашган. Биринчи марта у 2003 йилда “Сетора” гуруҳининг аъзоси Комила Хўжаевага уйланган. Уларнинг 2004 йилда туғилган Исом исмли ўғли бор. Аммо уларнинг биргаликдаги ҳаёт йўли узоққа бормади — хонандалар 2005 йилда ажрашган. Хонандалар ажралгандан кейин ҳам дўст бўлиб қолганини айтган. Комила Хўжаева фарзандининг отасини бу йилги туғилган куни билан Instagram орқали табриклади.
Узоқ вақт бўйдоқ юрган Илҳом Йўлчиев иккинчи марта, 2018 йилда турмуш қурган. Бу турмушдан Ином исмли ўғли бор. Аммо бу турмуш ҳам ўхшамаган. Хонанда собиқ аёли билан 2022 йилда ажрашган.
— Ўзимни яхшилаб боряпман, мен қанча яхши бўлсам, шунча яхши аёл келади. Мен муҳаббатсиз яшай олмайман, иккинчи аёлим билан ўртамизда севги, муҳаббат тугади, дейди хонанда.
“Элита оилаларнинг тўйи менга етади”
DJ Piligrim тўйга чиқиб хизмат қилиши 37 миллион сўмлигини рад этмайди.
— Хизмат ҳақим жуда катта, шунга яраша жамоам ҳам. Сифатли нарсаларнинг ҳаммаси қиммат бўлади. Тошкентда ўртача 350 тача элитадаги қатлам оилалар бўлса, шуларнинг тўй-хизматга чақириши бизга етади. Менинг буюртмачиларим элита оилалар. Оддий одамлар ҳам туғилган куни ва тўйида мен хизмат қилишимни хоҳлаши мумкин. Шунинг учун биз доим ёрдам тариқасида кам таъминланган оилаларнинг хизматига, вилоятларга ҳам бориб турамиз. Менда баланс бор, дейди у.
“Ҳаётимнинг энг яхши даврини кайф-у сафога сарфладим”
DJ Piligrim 2005—2009 йилларда гиёҳвандликка берилиб, молиявий қийинчиликларни бошдан кечирган.
— Ҳамма нарсанинг тўлови бўлади, тайёр туриш керак. Ўзимдан кичик ука-сингилларимга ёмон йўллардан қайтишини маслаҳат бераман. Мен энг гуллаган икки-уч йил давримда кайф-сафога берилиб, вақт йўқотганимга афсусланаман. Яхши асарлар яратсам, концертлар берсам бўларди. Лекин қилмаганман, дангаса бўлиб, кайф-у сафога кириб, нотўғри йўлда юрганман, дея афсусланади хонанда.
Изоҳ (0)