Ўзбекистонда айрим қонун ҳужжатларига ўзгартириш ва қўшимчалар киритилди, деб хабар бермоқда Адлия вазирлиги.
Қонун ҳужжатларига киритилган қўшимчаларга кўра, пиво ва пиво ичимлимклари, шунингдек, тамаки маҳсулотлари билан чакана савдо қилиш ҳуқуқи учун йиғимлар йиғим турлари жумласига киритилди.
Бунда пиво ва пиво ичимлимклари, шунингдек тамаки маҳсулотлари билан чакана савдо қилишни бошлаганлик ҳақида ваколатли давлат органини хабардор қилингани тўғрисида тасдиқномага эга бўлган юридик шахс ҳамда ЯТТлар ушбу йиғимларнинг солиқ тўловчилари деб эътироф этилади.
Шунингдек, 2030 йил 1 январгача паррандачилик маҳсулотларини ишлаб чиқарувчи тадбиркорлар юридик шахслардан олинадиган ер солиғини тўлашдан озод этилиши белгиланди.
Бундан ташқари, 2027 йил 1 январгача Касаба уюшмалари Федерацияси тизимидаги стасионар болалар соғломлаштириш оромгоҳлари қуйидаги солиқларни тўлашдан озод этилади:
- бино ва иншоотларни, ер участкаларини ижарага беришдан олинадиган даромадлари бўйича – фойда солиғини;
- ижарага берилган объектлар ва улар эгаллаган ер участкалари бўйича – мол-мулк солиғи ҳамда ер солиғини.
Қонун расмий эълон қилинган кундан эътиборан кучга киради.
Олий Мажлис қонунчилик палатасининг 13 февралдаги мажлисида паррандачилик соҳасини ривожлантириш, болалар соғломлаштириш оромгоҳларининг фаолиятини янада қўллаб-қувватлашга қаратилган қонун лойиҳасида 2030 йил 1 январга қадар паррандачилик маҳсулотлари ишлаб чиқарувчи тадбиркорлик субъектлари юридик шахслардан олинадиган ер солиғини (экин майдонларидан ташқари) тўлашдан озод этиш белгиланган эди.
Изоҳ (0)