Ғазо секторида очликдан ҳалок бўлган фаластинликлар сони 20 кишига етди. Бу ҳақда секторнинг Соғлиқни сақлаш вазирлигига таяниб, Al Jazeera хабар берди.
Ғазо шимолидаги очарчилик, айниқса, болалар, ҳомиладор аёллар ва сурункали касалликларга чалинган беморлар учун ҳалокатли даражага етди, — дейди вазирлик расмийси Ашраф ал-Қудра.
Унинг сўзларига кўра, 6 март куни Ғазо сектори шимолидаги Ал-Шифо тиббиёт мажмуаси ва Камол Адван касалхонасида 15 ёшли болакай ва 72 ёшли эркак тўйиб овқатланмаслик ва сувсизланишдан вафот этган.
Минглаб одамлар очликдан ўлиш хавфи остида, — дея огоҳлантирди Ал-Қудра ва Фаластин анклавига инсонпарварлик ва тиббий ёрдамни зудлик билан етказишга чақирди.
У Исроил армиясини “Ғазо шимолида оч қолган минглаб одамларни қасддан даҳшатли қирғин қилишда” айблаб, БМТга “Ғазо шимолида инсонпарварлик ва соғлиқ билан боғлиқ фалокатнинг олдини олиш учун” шошилинч чоралар кўришга чақирди.
Ғазо секторида 7 октябрда бошланган Исроил ҳужумлари оқибатида 30 700 дан ортиқ фаластинлик ҳалок бўлди, 72 000 дан ортиқ киши жароҳат олди.
БМТ маълумотларига кўра, Исроил уруши Ғазо аҳолисининг 85 фоизини озиқ-овқат, тоза сув ва дори-дармонларнинг кескин танқислиги шароитида ички кўчишга мажбур қилди, анклав инфратузилмасининг 60 фоизи шикастланган ёки вайрон бўлган.
Изоҳ (0)