“Андижон турмаси” номи билан танилган 3-сон тергов ҳибсхонаси шаҳар чеккасига кўчирилади. Бу ҳақда 16 апрель куни Шавкат Мирзиёев раислигидаги йиғилишда маълум қилинди.
Президент матбуот хизматининг билдиришича, шаҳар марказида жойлашган ушбу тергов ҳибсхонаси ўрнида замонавий кўнгилочар савдо ва сервис маркази барпо этилиши белгиланди.
Кундан кунга шаҳар кўркига кўрк қўшилиб турган вақтда 100 йил олдин қурилган бундай “совуқ” бинонинг марказда бўлиши нотўғри экани қайд этилди, дейилади хабарда.
“Андижон турмаси” — Андижон шаҳри марказида жойлашган 3-сон тергов ҳибсхонаси 1917 йилда қурилган. Ҳибсхонада спорт майдончаси, ошхона, 1 та фуқароларни қабул қилиш хонаси, 3 та адвокатлар хонаси, 2 та терговчилар хонаси мавжуд.
Йиғилишда президент Андижон вилоятига қўшимча 1 триллион сўм йўналтирилишини ҳам айтди. Вилоят ҳокимлиги, вилоят ташкилотлари раҳбарлари, 16 та шаҳар ва туман ҳокимлари аҳоли ва тадбиркорларни ҳар куни эшитиб, ҳозирги суръатни сақлаб қолиши шартлигини кўрсатиб ўтди. Андижонда бўш ётган барча ер ва бинолар аукционга чиқарилади. Бош прокуратура бу борада қатъий назорат ўрнатади.
Изоҳ (0)