Ўзбекистонда маҳсулот ва хизматларни “Ҳалол” талабларига мувофиқ сертификатлаштириш тартиби тўғрисидаги низомни тасдиқлаш ҳақидаги ҳукумат қарори қабул қилинди.
Ҳужжат билан қуйидагилар тасдиқланди:
- маҳсулот ва хизматларни “Ҳалол” талабларига мувофиқ сертификатлаштириш тартиби;
- “Ҳалол” талабларга мувофиқ сертификатлаштирилган маҳсулот ва хизматларни даврий баҳолаш.
Қарорга кўра, маҳсулот ва хизматларни “Ҳалол” талабларига мувофиқ сертификатлаштириш органи ташкил этилади. Маҳсулот ва хизматларни “Ҳалол” талабларига мувофиқ сертификатлаштиришда ҳамда уларга нисбатан талабларни белгилашда Ислом мамлакатлари стандартлари ва метрология институти (SMIIC) томонидан қабул қилинган ва расмий халқаро миқёсда эътироф этилган стандартларга устуворлик ҳуқуқи берилади.
2025 йил 1 майдан мазкур қарор ҳамда Ислом мамлакатлари стандартлари ва метрология институти стандартлари талаблари асосида сертификатлаштирилган маҳсулот ва хизматларни “Ҳалол” белгиси билан тамғалашга рухсат этилади.
Ўзбекистон техник жиҳатдан тартибга солиш агентлиги Дин ишлари бўйича қўмита билан олти ой муддатда агентлик тизимидаги давлат муассасасида ташкил қилинадиган маҳсулот ва хизматлатни “Ҳалол” талабларига мувофиқ сертификатлаштириш органини халқаро тан олинган ташкилотларни жалб қилган ҳолда аккредитациядан ўтказиши белгиланди. Шунингдек, “Ҳалол” белгиси шакли ҳамда ўлчамини белгилайдиган стандарт лойиҳани ишлаб чиқиб, тасдиқлаши лозим.
“Ҳалол” сертификати – муайян маҳсулот ёки хизматнинг “Ҳалол” стандарти талабларига мувофиқлигини тасдиқлаш учун сертификатлаштириш тизими қоидаларига биноан берилган ҳужжат бўлиб, таркибида ислом қоидалари ва меъёрларига биноан истеъмолга рухсат этилган “Ҳалол” маҳсулот ва хизматлар.
“Ҳалол” белгиси — муайян маҳсулот ёки хизматнинг “Ҳалол” стандарти талабларига мос эканлигини кўрсатиш учун маҳсулотга ёки кўрсатилган хизматга доир ҳужжатга қўйиладиган, белгиланган тартибда рўйхатга олинган белги.
Изоҳ (0)