Тошкент шаҳрининг Сергели туманидаги “Жўнариқ” маҳалласида жойлашган кўп қаватли уйларда яшовчи 1500 дан ортиқ хонадон вакиллари ишга бориб-келиш, шунингдек, шаҳар марказига чиқишда йўлсизликдан қийналаётгани ҳақида хабар берилганди. Сергели тумани ҳокимлиги аҳолининг эркин ҳаракатланиши учун муаммо туғдираётган лойли йўлни асфалтлаштирди.
Сергели тумани “Янги қўшнилар” турар-жой мажмуаси аҳолиси учун муҳим бўлган йўл қурилиши якунланди. Илгари вақтинчалик фойдаланилган йўл ўрнига янги асфалт ётқизилди, дейилади бу ҳақда жамоатчиликка ахборот берган ҳокимликнинг расмий Telegram каналида.
Ҳокимликнинг тан олишича, мазкур йўл “Янги қўшнилар” турар жой мажмуасидан “Юқори дархон” маҳалласидаги 76-сонли мактабга бориш учун муҳим йўналиш ҳисобланади.
Илгари бу ҳудудда доимий йўл мавжуд бўлмаганлиги сабабли, ўқувчилар ва маҳалла аҳолиси ноқулайликларга дуч келаётган эди. Ҳозирда янги йўл қурилиши ва асфалтлаш ишлари тўлиқ якунланиб, хавфсиз ва қулай ҳаракатланиш имкони яратилди. Ушбу йўл аҳолининг талаб ва мурожаатлари асосида қурилиб, у ерда яшовчи фуқаролар, айниқса, мактаб ўқувчилари учун катта қулайлик яратди. Бундан ташқари, йўл инфратузилмасини яхшилаш бўйича келгусида ҳам қўшимча ишлар амалга оширилиши режалаштирилган, дейди масъуллар.
Изоҳ (0)