Toshkent shahrining Sergeli tumanidagi “Jo‘nariq” mahallasida joylashgan ko‘p qavatli uylarda yashovchi 1500 dan ortiq xonadon vakillari ishga borib-kelish, shuningdek, shahar markaziga chiqishda yo‘lsizlikdan qiynalayotgani haqida xabar berilgandi. Sergeli tumani hokimligi aholining erkin harakatlanishi uchun muammo tug‘dirayotgan loyli yo‘lni asfaltlashtirdi.
Sergeli tumani “Yangi qo‘shnilar” turar-joy majmuasi aholisi uchun muhim bo‘lgan yo‘l qurilishi yakunlandi. Ilgari vaqtinchalik foydalanilgan yo‘l o‘rniga yangi asfalt yotqizildi, deyiladi bu haqda jamoatchilikka axborot bergan hokimlikning rasmiy Telegram kanalida.
Hokimlikning tan olishicha, mazkur yo‘l “Yangi qo‘shnilar” turar joy majmuasidan “Yuqori darxon” mahallasidagi 76-sonli maktabga borish uchun muhim yo‘nalish hisoblanadi.
Ilgari bu hududda doimiy yo‘l mavjud bo‘lmaganligi sababli, o‘quvchilar va mahalla aholisi noqulayliklarga duch kelayotgan edi. Hozirda yangi yo‘l qurilishi va asfaltlash ishlari to‘liq yakunlanib, xavfsiz va qulay harakatlanish imkoni yaratildi. Ushbu yo‘l aholining talab va murojaatlari asosida qurilib, u yerda yashovchi fuqarolar, ayniqsa, maktab o‘quvchilari uchun katta qulaylik yaratdi. Bundan tashqari, yo‘l infratuzilmasini yaxshilash bo‘yicha kelgusida ham qo‘shimcha ishlar amalga oshirilishi rejalashtirilgan, deydi masʼullar.
Izoh (0)