“Манчестер Сити” футболчиси Мануэл Аканжи Абдукодир Ҳусановнинг “шаҳарликлар” таркибидаги дебют ўйинига изоҳ берди.
“Ҳусанов учун ўйин унчалик муваффақиятли бошланмади аммо у ўзини аъло даражада тиклади. “Челси”га қарши биринчи ўйинни ўйнаш осон эмас. Биз уни қўллаб-қувватлашга ҳаракат қилдик ва у яхши уддалади. Мен уни кучли футболчиларга қарши ўйинда мураккаб вазиятларга туширмасликка ҳаракат қилдим.
Мен уни руҳлантирдим ва унга ортиқча ўйламасликни, фақат олдинга интилишни айтдим. Масалан, кейинги ҳаракатида тўпни ортга, Эдерсонга узатиб хавфсизроқ ҳаракат қилишни ёки яккакурашларда ютиб, ишончни қайтариш кераклигини таъкидладим”, дейди Аканжи.
Бундан ташқари ҳимоячи ўзбекистонлик футболчи инглиз тилини яхши тушунишини маълум қилди.
“У инглиз тилини француз тилига қараганда яхшироқ тушунишини айтди, шунинг учун мен у билан инглиз тилида гаплашаман. Менимча, у инглиз тили кўникмаларини яхшилайди — бу айниқса марказий ҳимоячилар учун муҳим. У кўп нарсани тушунади, аммо ҳозирча ўз фикрларини етказиб бера олмаяпти. Тез орада бу ўзгаради”, деди швейсариялик футболчи.
Маълумот учун, Абдуқодир Ҳусанов 23-тур доирасида бўлиб ўтган “Челси”га қарши ўйинда (3:1) илк бор “Манчестер Сити” сафида майдонга тушди. 2-дақиқада унинг хатосидан сўнг “Челси” ҳисобни очди. Аммо кейинчалик футболчи ишончли ҳаракат қилди ва “аристократлар”нинг кўплаб ҳужумларини қайтаришда асосий рол ўйнади.
Учрашувда Гвардиола шогирдлари 3:1 ҳисобида ғалаба қозониб, АПЛда 4-ўринга кўтарилди.
Изоҳ (0)