San’atkorlar oilasi, ustoz aktyorlar Saida Rametova va Jumadulla Rametov “Milliy” kanalining “Ikkalamiz” loyihasi uchun intervyu berdi. Intervyu davomida ular oila qurish jarayonidagi qiziqarli sevgi tarixini yodga oldi.
Saida va Jumadulla Rametovlar teatrda ishlab yurgan kezlari hali turmush qurmasdanoq bir-biri bilan do‘st bo‘lgan. Ularning sevgi tarixi esa shunday boshlangan:
— Jumadulla juda kelishgan yigit edi, oilada bir o‘g‘il farzand bo‘lgan. Yoshi ham 27 ga yaqinlashganda qarindoshlarning gap-so‘zi tufayli qaynotam endi seni uylantiramiz, degan. Jumadullaning menda ko‘ngli bor ekan, menga turmushga chiqishni taklif qilganda, kelishgan, yaxshi yigit-ku, deya o‘ylanib mayli, degandim. U vaqtda hali men u kishini sevib qolmagandim, shunchaki inson sifatida hurmat qilardim. Shu orada uning tanishlaridan Jumadullaga o‘zi tarafdan bir qarindosh qizni mo‘ljallab qo‘yishgan, degan gapni eshitib qoldim. Uning ismi ham Saida edi, peshonalariga Saidalar yozilgan ekan-da (kulib). Keyin ota-onasi o‘sha qizni olib bermoqchi bo‘lsa, men ularning o‘rtasiga tushib baxtini buzmayman, deganman va Jumadulla bilan do‘st bo‘lib qolishga kelishganmiz. So‘ng bilsam, u qizni shunchaki ko‘zlab yurishgan ekan, hammada ham bo‘ladi-ku, shunday-da, deya esladi Saida Rametova.
“Jumadulla qiz o‘g‘irlab keldi”
— Xullas, shunday qilib bir kuni teatrda charchab o‘tirgan vaqtim edi. Jumadulla “Do‘stmiz-ku, yuring, sizga muzqaymoq olib beraman” dedi. Yolg‘iz o‘g‘il bo‘lgani uchun otasi sovg‘a qilgan mashinasi bor edi, shunga o‘tirganman. Uzoq yurganmiz, nega to‘xtay qolmayapti, deb bir vaqt qarasam, mashinani mingga qo‘yib Turkiston tomonga haydab ketyapti. To‘xtating, men tushaman deyishimga qaramay, meni Turkistondagi qarindoshlarining uyiga olib borgan. “Voy, Jumadulla qiz o‘g‘irlab keldi” deb birpasda gap tarqalgan. Ularning oilasi Turkiston va Qozog‘istonda yashaydigan o‘zbeklar edi, u taraflarda qiz olib qochish odatiy hol bo‘lgan. Lekin mening ota yurtim Samarqandda bunday qilinmaydi, menga uylanmoqchi bo‘lsangiz, hurmat-obro‘yimni joyiga qo‘yib uylaning, bunday olib qochib ketib emas, deb qattiq gapirganman. Ertasi kuni qaynona-qaynotam yetib kelishgan va menga “Rahmat qizim, juda aqlli qiz ekansan, baraka top” deyishdi. Aktrisa bo‘lsa ham, hurmatini biladigan, o‘ziga pishiq qiz ekan, bizga yoqdi, deya rozi bo‘lishgan. To‘yimiz 1981-yilda juda chiroyli bo‘lib o‘tgan, Jumadulla 27 da, men 25 yoshda bo‘lganman.
“Sog‘ayishi uchun borimni berardim”
Saida Rametovaga shuncha yil ijod qildingiz, xalqning ko‘nglidan joy oldingiz va shuning evaziga ko‘plab mukofotlar, unvonlar sohibi bo‘ldingiz — shu unvonlaringizni birgina orzuyingiz amalga oshishi uchun almashish imkoni bo‘lsa, bu nimaning evaziga bo‘lardi, deya berilgan savolga aktrisa:
“Turmush o‘rtog‘imning butunlay sog‘ayib ketishiga borimni almashardim”, deya ko‘zlarida yosh bilan javob berdi.
“Hozir uydamanmi, teartrdami, deya so‘raydigan bo‘lib qolgandi”
Jumadulla Rametovning betobligi haqida ko‘pchilikning xabari bor, ammo aktyorning bugungi holati ancha yaxshi. Karantin vaqtida u virus bilan kasallangan, so‘ng sog‘aygan bo‘lsa-da, asta-sekinlik bilan xotira yo‘qotish holati kuzatila boshlagan. Saida Rametovaning so‘zlariga ko‘ra, Jumadulla Rametov avvaliga kichik narsalarni esidan chiqargan, so‘ng “Hozir uydamanmi, teatrdamanmi?” deya so‘raydigan bo‘lgan. Bundan xavotirlangan oila a’zolari aktyorni shikoforga olib borgan. Vrachlar keksayib qolgan aktyorga xotira sustlashishi deya Alsgeymer kasalligi tashxisini qo‘ygan, buni avval koronavirusga chalinganlik asorati bilan bog‘lagan. Uzoq davolanishlardan so‘ng Jumadulla Rametov avvalgi holatiga qaraganda bugun ancha tetik.
— Hozirda turmush o‘rtog‘im nafaqa oladi, avvalroq ishlamasa ham, teatrdan oylik berilayotgandi. Yo‘q, teatrga ishga bormayapman, oylik kerakmas, menikini ham yoshlarga berishsin, degan. Shuncha yil ishladingiz, sizni siylashyapti, desam ham ko‘nmagan. Men to‘y xizmatlari yoki syomkalar sabab teatrga borolmagan kunlarim bo‘lgan. Ammo Jumadulla Rametov biror marta teatrga xiyonat qilmagan inson, deydi Saida Rametova.
Izoh (0)