“Real Madrid” hujumchisi Vinisius Juniorning klub ichidagi munosabatlari yomonlashmoqda. Jamoadagi ko‘pchilik futbolchining xatti-harakatidan norozi, deya xabar berdi Cadena Ser.
“U o‘zini tutish tarzini hoziroq o‘zgartirishi kerak, chunki bu sababli klub ichida unga bo‘lgan qo‘llab-quvvatlash pasaymoqda. Vinisius avgust oyidagi o‘yinlarda yaxshi ishtirok etdi, ammo hozir vaziyat o‘zgardi va klubda unga oldinga qadam tashlash vaqti yetganligi haqida gapirayotganlar ko‘paymoqda.
Asosiy sabab shundaki, futbolchi “Real”ga kelganidan beri klub unga ko‘rsatayotgan qo‘llab-quvvatlashdan foydalana olmayapti. Klub uni himoya qilayotganini va jamoadoshlari yordamini ko‘rdi, ammo hozirgi Vinisius ularga yoqmayapti. Braziliyalik futbolchi turli maishiy muammolarga e’tibor qaratmoqda va u futbol o‘ynashdan chalg‘imoqda. To‘g‘ri, u gollar urishda davom etyapti, lekin men Vinining holatidan xavotirlanyapman. Avvaliga bu unchalik muhim bo‘lib tuyulmagandi, ammo so‘nggi haftalarda bu borada xavotir sezdim. Vinining fikricha, faqatgina Anchelotti uni tushunadi va uning tarafini oladi”, deya jurnalistning so‘zlarini keltiradi nashr.
Eslatib o‘tamiz, avvalroq Vinisius agar mamlakatda irqchilik bilan bog‘liq vaziyat o‘zgarmasa, Ispaniya keyingi Yevro o‘yinlarini o‘tkazish huquqidan mahrum etilishi kerakligini aytgan edi. Bu bayonot braziliyalikka nisbatan katta salbiy munosabatga sabab bo‘ldi.
Izoh (0)