“Челси” ҳужумчи билан, “Реал” эса украиналик дарвозабон билан шартномани узайтирди

Лондон ва Мадрид клублари ўз футболчилари билан шартномаларини узайтирди. “Аристократлар” 23 ёшли ҳужумчи Николас Жексон билан шартномани 2033 йилгача узайтиришини расман эълон қилди. Аввалги келишув 2031 йилнинг ёзига қадар амалда эди.

“Бу фақат бошланиши. «Челси» Николас Жексон билан 2033 йилгача мўлжалланган янги шартнома имзолаганини мамнуният билан эълон қилади”, дейилади клуб матбуот хизмати Х (собиқ Twitter) ижтимоий тармоғидаги баёнотида.

Сенегаллик футболчи ўтган ёзда “Вильярреал”дан Лондон клубига ўтган эди. Бу даврда у барча турнирларда 47 та учрашувда қатнашиб, 18 та гол ва 7 та голли узатмани амалга оширган. Transfermarkt порталида берилган маълумотларга кўра, 23 ёшли футболчининг бозор қиймати 35 миллион еврони ташкил қилади.

Украиналик дарвозабон Андрей Лунин ҳам “Реал” билан шартномасини узайтирди. Мадридликлар 25 ёшли дарвозабон билан 2030 йилгача шартнома имзолаганини эълон қилди.

Лунин 2018 йилда “Реал” клубига ўтган эди. Украиналик футболчи клуб билан 10 та соврин, жумладан, 2 та Чемпионлар Лигаси ва 2 бора Ла Лигада ғолиб чиққан.

Ўтган мавсумда Андрей Тибо Куртуа жароҳатидан сўнг “Реал Мадрид”нинг асосий дарвозабони бўлганди. У бу мавсумда ҳали майдонга тушмади.