Toshkentda 121 ta jarimani to‘lamay kelgan rejissyorning mashinasi xatlandi

Toshkent shahar Olmazor tumanida 121 ta jarimani to‘lamay kelgan rejissyorning mashinasi xatlandi. Bu haqda MIB axborot xizmati “Daryo”ga xabar berdi. 

Ma’lum qilinishicha, majburiy ijro byurosining Olmazor tuman bo‘limi ish yurituviga Toshkent shahar YHXBning qarorlariga ko‘ra, qarzdor M.S.dan undiruvchi davlat va bank foydasiga jami 121 ta 84 million so‘m miqdoridagi ma’muriy jarima undirish to‘g‘risidagi ijro hujjatlari kelib tushgan.

Ma’muriy jarimalar bilan bog‘liq ijro hujjatlari 2023-yildan 2024-yilga qadar jami 121 ta bo‘lsa, shundan tezlik 77 ta, yo‘l chizig‘i 22 ta, svetoforning taqiqlovchi ishorasiga amal qilmaslik 16 ta hamda 4 marotaba yo‘l qatnov qismining qarama-qarshi yo‘nalishida harakatlanib, qoidabuzarliklar sodir qilgan.

Qarzdor ma’muriy jarimalar, bank oldidagi kredit qarzi hamda davlat foydasiga boj pullarini ixtiyoriy to‘lamay kelgani bois byuroning tuman bo‘limi tomonidan majburiy ijro harakatlariga kirishilgan. Ijro harakatlari davomida qarzdorga tegishli bo‘lgan avtotransport vositasi qarzdorning xonadonidan topilib, xatlandi va jarima maydoniga joylashtirildi.

Qarzdor qoidalarni buzishi uning rejissyorlik va aktyorlik kasbi bilan bog‘liqligini bildirib, shuningdek, yo‘lda shoshib yurishini aytgan.