Самира Идрисова 16 ёшда, у ҳаётининг синовли даврини бошдан кечирмоқда — оққон касали билан курашмоқда. Бироқ соғлиғидаги муаммоларга қарамай, у умидини йўқотмади. Самира расм чизишга бўлган қизиқиши билан ўзи ўқиётган “Меҳрли мактаб”да танилган — бу санъат унинг ҳаётига ёруғлик олиб келди ва у учун қийинчиликларга қарши куч бўлиб хизмат қилди.
— Оддий болалар каби мактабда ўқийман. Расм чизишни ёқтираман, хоббиларим – тўқиш, тикиш ва мозаика ясаш. Болаликдан ўзим учун расм чизаман. Гематология шифохонасига тушганимдан кейин “Меҳрли мактаб”га бордим. Касалхонада даволаниш жараёнида расм чизишга қизиқишим янада ортди. Мактабимизда тажрибали, профессионал устозлар кўп. Улар менинг хатоларимни кўриб, тўғрилайди, маслаҳатларини аямайди. Шу сабабли ҳам борган сари санъат оламига чуқурроқ кириб бордим, дея ҳикоясини бошлади Самира.
— Кейинчалик ўзим ҳам болалар билан ишлашда устозларимга ёрдам бера бошладим, болаларга йўл қўяётган хатоларини кўрсатаман, шу оддий мулоқот орқали улар билан ўз билганларимни бўлишаман, дейди у.
“Замин” фонди лойиҳаси доирасида ташкил этилган Ўзбекистондаги илк госпитал мактабда узоқ муддат давомида даволанаётган ҳамда мактаб ёки боғчага бориш имкониятига эга бўлмаган болалар таълим олади.
“Меҳрли мактаб” — фақатгина ўқув муассасаси эмас. Мактаб Ўзбекистон учун янги йўналиш — госпитал педагогика соҳасида зарур методологияни яратиш учун ҳам илмий ва амалий таянч бўлиб хизмат қилмоқда.
Самира Хитойда университетда таҳсил олишни орзу қилади, чунки бу мамлакатнинг илғор таълим тизими ва санъат соҳасидаги ютуқлари унга илҳом беради. Самиранинг орзулари ва қизиқувчанлиги унинг ҳаётга бўлган севгисини кўрсатади.
“Қизиқишларимдан яна бири — хитой тилини ўрганиш. Мактабни тамомлагач, Шарқшунослик университетига кириб, Хитойда таҳсилни давом эттириш ниятим бор”.
— Бизнинг ҳаётимиз ўтмиш ва келажакдан иборат, чизган бу суратимда бутун сайёранинг ўтмишсиз келажаги йўқ, деган ғояни тасвирлаганман, дея ўзининг санъат асарларини кўрсатди Самира.
Самира “Меҳрли мактаб”да кўплаб танлов ва тадбирларда ҳам фаол қатнашиб келади ҳамда юқори ўринларни эгаллайди. Унга ўзи каби билимли ўқувчилар билан фан доирасида баҳслашиш, мунозара қилиш қизиқ. Қизалоқнинг оиласи ва устозлари унинг соғлиғи билан боғлиқ барча қийинчиликларга қарамай, унга доимий равишда мотивация беради ва қўллаб-қувватлайди. Уларнинг меҳрибонлиги ва эътибори Самиранинг ҳаётида нафақат тиббий курашда, балки орзулари йўлида давом этишда ҳам муҳим рол ўйнайди.
Самиранинг тасвирий санъатдаги иштиёқи ва келажакдаги мақсадлари унинг жасорати ва умидларини акс эттиради. Унинг орзулари ва қизиқувчанлиги келажакда катта муваффақиятларга эришишига ёрдам беради, шунингдек, у учун янги имкониятлар ва келажакдаги ютуқларга йўл очади. Самирага ўзининг мақсадларига эришишда муваффақиятлар тилаймиз ва орзуларининг амалга ошаётганини кўришни орзиқиб кутамиз.
Видеони тўлиқ ҳолда қуйида томоша қилишингиз мумкин.
Комила Қаландарова суҳбатлашди.
Изоҳ (0)