Samira Idrisova 16 yoshda, u hayotining sinovli davrini boshdan kechirmoqda — oqqon kasali bilan kurashmoqda. Biroq sog‘lig‘idagi muammolarga qaramay, u umidini yo‘qotmadi. Samira rasm chizishga bo‘lgan qiziqishi bilan o‘zi o‘qiyotgan “Mehrli maktab”da tanilgan — bu san’at uning hayotiga yorug‘lik olib keldi va u uchun qiyinchiliklarga qarshi kuch bo‘lib xizmat qildi.
— Oddiy bolalar kabi maktabda o‘qiyman. Rasm chizishni yoqtiraman, xobbilarim – to‘qish, tikish va mozaika yasash. Bolalikdan o‘zim uchun rasm chizaman. Gematologiya shifoxonasiga tushganimdan keyin “Mehrli maktab”ga bordim. Kasalxonada davolanish jarayonida rasm chizishga qiziqishim yanada ortdi. Maktabimizda tajribali, professional ustozlar ko‘p. Ular mening xatolarimni ko‘rib, to‘g‘rilaydi, maslahatlarini ayamaydi. Shu sababli ham borgan sari san’at olamiga chuqurroq kirib bordim, deya hikoyasini boshladi Samira.
— Keyinchalik o‘zim ham bolalar bilan ishlashda ustozlarimga yordam bera boshladim, bolalarga yo‘l qo‘yayotgan xatolarini ko‘rsataman, shu oddiy muloqot orqali ular bilan o‘z bilganlarimni bo‘lishaman, deydi u.
“Zamin” fondi loyihasi doirasida tashkil etilgan O‘zbekistondagi ilk gospital maktabda uzoq muddat davomida davolanayotgan hamda maktab yoki bog‘chaga borish imkoniyatiga ega bo‘lmagan bolalar ta’lim oladi.
“Mehrli maktab” — faqatgina o‘quv muassasasi emas. Maktab O‘zbekiston uchun yangi yo‘nalish — gospital pedagogika sohasida zarur metodologiyani yaratish uchun ham ilmiy va amaliy tayanch bo‘lib xizmat qilmoqda.
Samira Xitoyda universitetda tahsil olishni orzu qiladi, chunki bu mamlakatning ilg‘or ta’lim tizimi va san’at sohasidagi yutuqlari unga ilhom beradi. Samiraning orzulari va qiziquvchanligi uning hayotga bo‘lgan sevgisini ko‘rsatadi.
“Qiziqishlarimdan yana biri — xitoy tilini o‘rganish. Maktabni tamomlagach, Sharqshunoslik universitetiga kirib, Xitoyda tahsilni davom ettirish niyatim bor”.
— Bizning hayotimiz o‘tmish va kelajakdan iborat, chizgan bu suratimda butun sayyoraning o‘tmishsiz kelajagi yo‘q, degan g‘oyani tasvirlaganman, deya o‘zining san’at asarlarini ko‘rsatdi Samira.
Samira “Mehrli maktab”da ko‘plab tanlov va tadbirlarda ham faol qatnashib keladi hamda yuqori o‘rinlarni egallaydi. Unga o‘zi kabi bilimli o‘quvchilar bilan fan doirasida bahslashish, munozara qilish qiziq. Qizaloqning oilasi va ustozlari uning sog‘lig‘i bilan bog‘liq barcha qiyinchiliklarga qaramay, unga doimiy ravishda motivatsiya beradi va qo‘llab-quvvatlaydi. Ularning mehribonligi va e’tibori Samiraning hayotida nafaqat tibbiy kurashda, balki orzulari yo‘lida davom etishda ham muhim rol o‘ynaydi.
Samiraning tasviriy san’atdagi ishtiyoqi va kelajakdagi maqsadlari uning jasorati va umidlarini aks ettiradi. Uning orzulari va qiziquvchanligi kelajakda katta muvaffaqiyatlarga erishishiga yordam beradi, shuningdek, u uchun yangi imkoniyatlar va kelajakdagi yutuqlarga yo‘l ochadi. Samiraga o‘zining maqsadlariga erishishda muvaffaqiyatlar tilaymiz va orzularining amalga oshayotganini ko‘rishni orziqib kutamiz.
Videoni to‘liq holda quyida tomosha qilishingiz mumkin.
Komila Qalandarova suhbatlashdi.
Izoh (0)