“Туянинг думи ерга текканда беради”. Олмалиқдаги 3-мис бойитиш фабрикасини қураётган ишчилар Мустақиллик байрамини маошсиз ўтказди

Олмалиқ кон-металлургия комбинати таркибидаги 3-мис бойитиш фабрикаси қурилишида ишлаётган ишчилар Ўзбекистон мустақиллигининг 33 йиллигини пулсиз кутиб олди. Бу фабрикани Enter Engineering компанияси қурмоқда. Бу ҳақда “Дарё”га мурожаат қилган ишчилар маълум қилди. 

Исм-фамилиясини очиқласа, ишдан бўшатилиши ёки босимга учрашидан қўрққан ходимларнинг айтишича, уларга 2024 йилнинг май ойи учун “аванс” берилган холос. 

Балки, ишонмассиз, 2024 йилнинг сентябрь ойи келди. Лекин биз май ойи учун “аванс” олганимизча ишлаб юрибмиз. Ойликни беришмаяпти. Ўзбекистонликларнинг барчаси мустақиллигимизнинг 33 йиллигини ўз вақтида олинган маош ва мукофот пуллари билан яхши кайфиятда кутиб олишган бўлса, биз бир тийинсиз, муаммолар билан қарши олдик, дейди “Дарё” журналисти билан суҳбатлашган ишчи. 

“Дарё”га шикоят қилиб, турмуш ўртоғи тўрт ойдан бери маошсиз ишлаётганини, хонадонига бир неча ойдан бери гўшт кирмаганини айтган аёл мис фабрикасида ишлаётган қурувчилардан бошлиқлар базми учун пул йиғилишини айтмоқда. 

Хўжайиним Олмалиқ кон-металлургияга қарашли мис бойитиш фабрикаси қурилишида ишлайди. Мана тўрт ойдан бери ойлик беришмайди. Эрим дам олиш кунлари такси қилиб, рўзғор тебратади. Ҳар доим шу аҳвол. Яна нимадир йўқолса, ишчилардан пул йиғиб, жойига янги қўйдиришади. Уям етмаганидек, бошлиқларнинг еб-ичишига ҳам ишчилардан пул йиғилади. Бу ташкилот билан ҳеч ким шуғулланмайди. Текшириш келса, ишчилардан пул йиғиб, текширувчини меҳмон қилиб, қайтариб юборишади. Эрим ишдан бўшаб кетолмайди. Боиси, ҳозирги кунда иш топиш муаммо. Бизнинг ҳам гўшт егимиз келади, лекин пулимиз йўқлиги сабабли олиб еёлмаймиз. Иш ҳақини сўраб боришса, ишдан бўшатиб юборишади, дейди эри ва ўзининг исм-фамилияси сир қолишини сўраган суҳбатдош. 

Яна бир суҳбатдош сёмка давомида фарзандлари учун янги ўқув йили бошланаётганини, ҳали мактаб форма ва ўқув қуроллари сотиб олмаганини айтди. 

Янги ўқув йили ҳам бошланди. Ойликларни ўз вақтида олмаганимиз учун мактаб форма ҳам, ўқув қуроллари ҳам сотиб ололмадик. Болаларим бу йил мактабга эски формасида чиқишадиган бўляпти, дейди суҳбатдош. 

Telegramъда ишчиларнинг ахборот алмашиши учун ташкил этилган гуруҳда маошини ололмаётган ишчилар бир-биридан янгилик ҳақида сўрар экан “Маошимиз туянинг думи ерга текканда, қизил қор ёққанда берилади”, дея киноя қилмоқда. 

Олмалиқ кон-металлургия комбинати ахборот хизматининг “Дарё”га билдиришича, комбинат таркибидаги 3-мис бойитиш фабрикаси қурилиши Enter Engineering компанияси томонидан бажарилмоқда. Ишчиларига маошини ўз вақтида бермаслиги билан жамоатчиликка яхши таниш бўлган мазкур компания ахборот хизмати “Дарё” сўровига жавоб берар экан, маошлар секин-аста берилаётганини айтиб, шу мавзуни ҳозирча олиб чиқмаслик ҳақида маслаҳат бериш билан чекланди.