Умримизнинг учдан бир қисмини уйқу билан ўтказиб юбориб, кўп нарсаларни бой беряпмиз, деган хавотирли гапларни кўп эшитамиз. Аммо унутмаслик керакки, уйқу соғлом ҳаётнинг асосий таркибий қисмидир. Уйқусизлик вазн ортиши, юрак муаммолари ва ҳатто депрессияга олиб келиши мумкин. Россиялик кардиолог Анна Кореневич соғлом бўлиш ва тўйиб уйғониш учун қанча вақт ухлаш кераклиги ҳақида маълумот берди.
Шифокор сўзларига кўра, уйқу ҳам жисмоний, ҳам руҳий саломатлигимизда муҳим рол ўйнайди:
Уйқусизлик умумий саломатликка салбий таъсир кўрсатиши ва турли касалликлар ўчоғига айланиши мумкин. Таъкидлаш жоизки, баъзилар учун тўрт соатлик уйқу, қолганларга эса саккиз соатлик уйқу етарли бўлади, деган гаплар доим ҳам ҳақиқатга тўғри келавермайди, — дейди кардиолог.
Бундан келиб чиқадики, ҳар бир кишининг уйқуга бўлган эҳтиёжи турлича, аммо аксарият шифокорлар оптимал соғлиқни сақлаш учун катталарга 7-9 соат ухлашни тавсия қилишади. Чунки узоқ вақт уйқуга тўймаслик соғлиқ учун жиддий оқибатларга олиб келиши мумкин. Шифокорнинг фикрича, мунтазам уйқу режимига амал қилишга ҳаракат қилиш, қулай дам олиш шароитларини яратиш орқали кўпроқ умр кўриш мумкин.
Уйқу сифатини яхшилаш учун ҳар куни бир вақтда уйқуга ётиш, ухлашдан камида бир соат аввал телевизор кўрмаслик, компьютерда ёки телефонда ўтирмаслик, ухлашдан икки соат олдин эса овқатланмаслик лозим. Кечки пайт тоза ҳавода сайр қилиш, спиртли ичимликлар, уйқу таблеткалари ва қаҳва кабиларни чеклаш уйқу сифатини оширишга ёрдам беради, дея маслаҳат берди Анна Кореневич.
Бундан ташқари, сифатли ва табиий матодан тикилган чойшаблар яхши ухлашга ёрдам беради. Пахта, лён, ипак каби табиий материаллар ҳавони яхши ўтказиш ҳисобига ётоқда қулай микроиқлимни таъминлайди ҳамда ортиқча терлаш ва аллергик реакция бўлмаслигига кўмак беради.
Изоҳ (0)