Umrimizning uchdan bir qismini uyqu bilan o‘tkazib yuborib, ko‘p narsalarni boy beryapmiz, degan xavotirli gaplarni ko‘p eshitamiz. Ammo unutmaslik kerakki, uyqu sog‘lom hayotning asosiy tarkibiy qismidir. Uyqusizlik vazn ortishi, yurak muammolari va hatto depressiyaga olib kelishi mumkin. Rossiyalik kardiolog Anna Korenevich sog‘lom bo‘lish va to‘yib uyg‘onish uchun qancha vaqt uxlash kerakligi haqida ma’lumot berdi.
Shifokor so‘zlariga ko‘ra, uyqu ham jismoniy, ham ruhiy salomatligimizda muhim rol o‘ynaydi:
Uyqusizlik umumiy salomatlikka salbiy ta’sir ko‘rsatishi va turli kasalliklar o‘chog‘iga aylanishi mumkin. Ta’kidlash joizki, ba’zilar uchun to‘rt soatlik uyqu, qolganlarga esa sakkiz soatlik uyqu yetarli bo‘ladi, degan gaplar doim ham haqiqatga to‘g‘ri kelavermaydi, — deydi kardiolog.
Bundan kelib chiqadiki, har bir kishining uyquga bo‘lgan ehtiyoji turlicha, ammo aksariyat shifokorlar optimal sog‘liqni saqlash uchun kattalarga 7-9 soat uxlashni tavsiya qilishadi. Chunki uzoq vaqt uyquga to‘ymaslik sog‘liq uchun jiddiy oqibatlarga olib kelishi mumkin. Shifokorning fikricha, muntazam uyqu rejimiga amal qilishga harakat qilish, qulay dam olish sharoitlarini yaratish orqali ko‘proq umr ko‘rish mumkin.
Uyqu sifatini yaxshilash uchun har kuni bir vaqtda uyquga yotish, uxlashdan kamida bir soat avval televizor ko‘rmaslik, kompyuterda yoki telefonda o‘tirmaslik, uxlashdan ikki soat oldin esa ovqatlanmaslik lozim. Kechki payt toza havoda sayr qilish, spirtli ichimliklar, uyqu tabletkalari va qahva kabilarni cheklash uyqu sifatini oshirishga yordam beradi, deya maslahat berdi Anna Korenevich.
Bundan tashqari, sifatli va tabiiy matodan tikilgan choyshablar yaxshi uxlashga yordam beradi. Paxta, lyon, ipak kabi tabiiy materiallar havoni yaxshi o‘tkazish hisobiga yotoqda qulay mikroiqlimni ta’minlaydi hamda ortiqcha terlash va allergik reaksiya bo‘lmasligiga ko‘mak beradi.
Izoh (0)