Iyul oyining so‘nggi kunlarida Saudiya Arabistonida butunjahon 56-Xalqaro Mendeleyev kimyo olimpiadasi o‘tkazildi. Unda 87 ta davlatdan 340 dan ortiq iqtidorli o‘quvchilar ishtirok etdi. O‘zbekiston nomidan qatnashgan o‘quvchilar 1 ta oltin, 2 ta kumush va 1 ta bronza medalini qo‘lga kiritishdi.
Suhbatdoshimiz Daler Rahimov olimpiadada oltin medal sohibi bo‘ldi. U poytaxtdagi Abu Ali ibn Sino maktabining 10-sinfida tahsil oladi. Daler Rahimov olimpiadadan olgan taassurotlarini “Daryo” bilan o‘rtoqlashdi.
— Kimyo faniga qiziqishimga ota-onam va ustozlarim sababchi bo‘lgan. Kichik yoshimdan boshlab, aniq fanlarga qiziqqanman. Keyinchalik kimyo va fizika faniga bo‘lgan qiziqishim ham ortgan. Xalqaro olimpiadalar haqida eshitib, menda ularda ishtirok etish maqsadi paydo bo‘lgan.
Abu Ali ibn Sino maktabiga qabul qilinganimdan keyin jamoa bilan xalqaro olimpiadalarga tayyorlandik. Ishtirok etish davomida albatta hayajon bo‘ladi. Chunki O‘zbekiston sha’nini himoya qilish mas’uliyati bor.
Olimpiadada 87 tadan ortiq davlatdan ishtirokchilar qatnashdi. Ular bilan fikr almashdik, ta’lim tizimi haqida qiziqdik. Bu yilgi kimyo olimpiadasida laboratoriya bosqichi biroz qiyinroq kechdi. Shu bois ballar biroz past bo‘lgani haqida aytishdi.
O‘zbekiston jamoasi muvaffaqiyatli ishtirok etishida ustozlarimizning hissasi katta. Tayyorgarlik jarayonida ustozlarimiz bizdan ko‘proq mehnat qilishdi. Ularning ishonchi va bergan bilimlari bizga qo‘l keldi. Kelajakda xorij tilini o‘rganib, yanada nufuzli xalqaro olimpiadalarda ishtirok etish niyatim bor, — deydi Daler Rahimov.
Eslatib o‘tamiz, Xalqaro fan olimpiadalari g‘oliblariga davlat byudjetidan quyidagicha pul mukofoti beriladi:
1-o‘ringa — 170 mln so‘m, ustoziga — 153 mln so‘m;
2-o‘ringa — 102 mln so‘m, g‘olibning ustoziga — 85 mln so‘m;
3-o‘ringa — 68 mln so‘m, g‘olibning ustoziga — 51 mln so‘m.
Ushbu o‘quvchilar davlat OTMlariga test sinovisiz va qo‘shimcha imtihonsiz grant asosida talabalikka qabul qilinadi.
Izoh (0)