Олий Мажлис Қонунчилик палатасининг 30 июлдаги мажлисида “Давлат ижтимоий суғуртаси тўғрисида”ги қонун лойиҳаси биринчи ўқишда кўриб чиқилиб, қабул қилинди.
Қонун лойиҳаси билан давлат ижтимоий суғуртаси бўйича тўланадиган қуйидаги нафақалар турлари белгиланмоқда:
- касаллик — ишчиларнинг бетоблиги сабабли меҳнатга лаёқатсизлиги даври учун тўланадиган нафақа;
- “декрет” — аёлларнинг туғуруққача ва туғуруқдан кейинги даври учун тўланадиган нафақа;
- ишдан бўшатиш нафақаси — фуқароларнинг вақтинча ишсизлиги даврида тўланадиган нафақа.
Шунингдек, қонун лойиҳасида Ижтимоий суғурта жамғармаси томонидан аҳолини суғурталаш тизими жорий этилиши белгиланмоқда. Инсон ҳаёти ва фаолияти давомида вақтинча меҳнат қобилиятини йўқотганида (ўзи ёки фарзанди касал бўлганида, қисқа даволанишда, туғуруқ даврида) ёки ишсиз қолганида ижтимоий суғурта жамғармаси ҳисобидан ижтимоий қўллаб-қувватланади.
Қонун лойиҳаси билан мазкур жараён уч босқичда амалга оширилиши белгиланмоқда:
Биринчи босқичда 2025 йил 1 июлдан бошлаб барча суғурталанган аёлларга, уларнинг бандлик ва меҳнат фаолияти тури, суғурталаш манбасидан қатъи назар, ҳомиладорлик ва туғиш нафақаси тўлаб берилади;
Иккинчи босқичда 2026 йил 1 январдан барча суғурталанган жисмоний шахсларга, уларнинг бандлик ва меҳнат фаолияти тури, суғурталаш манбасидан қатъи назар, вақтинчалик меҳнатга лаёқатсизлик нафақаси тўлаб берилади;
Учинчи босқичда президент қарорларига асосан суғурталанган шахсларга ишсизлик нафақаси ва бошқа турдаги тўловлар жорий этилиши кўзда тутилмоқда.
Депутатларнинг таъкидлашича, қонун лойиҳасининг қабул қилиниши фаолият туридан қатъи назар, ишлаётган ходимларга вақтинчалик меҳнатга лаёқатсизлик нафақаси, ҳомиладорлик ва туғиш нафақаси ҳамда ишдан бўшатиш нафақасини тўлиқ тўланишига, ижтимоий фаол аҳолининг камбағал оилалар тоифасига тушиб қолишининг олдини олишга хизмат қилади.
Изоҳ (0)