Олимпиада можаро билан бошланди. Аргентинанинг Марокаш дарвозасига урган голи 2 соатдан сўнг бекор қилинди

Париж Олимпиадасида Аргентина ва Марокаш терма жамоалари ўртасидаги ўйин трибунадаги тартибсизликлар туфайли бир муддатга тўхтатилди.

Аргентина ва Марокаш футбол турнирининг биринчи тури доирасида ўзаро тўқнаш келди.

Иккинчи бўлимнинг 15-қўшиб берилган дақиқасида аргетиналиклар ҳисобни тенглаштирди (2:2), бироқ ҳакам Гленн Нюберг видеотакрорни кўриш учун ВАРга мурожаат қилган.

Бу вақтда эса трибунада тартибсизликлар бошланган ва ҳакам жамоаларни кийим алмаштириш хонасига кетишини сўраган. Шундан сўнг томошабинлар стадионни тарк этган. 

Тошкент вақти билан 18:00 да бошланган учрашув орадан 22:00 гача тўхтаб турган. Ўйин тўхтатилганидан 2 соат вақт ўтгач, ҳакам учрашувни давом эттирган ва бўш стадионда ВАРни кўриб чиққан. Натижада аргентиналикларнинг голи бекор қилинди ва 2:1 ҳисобида мағлубиятга учради.