O‘zbekiston milliy terma jamoasi bosh murabbiyi Timur Kapadze Parijdagi Olimpiadada Ispaniyaga qarshi o‘yindagi mag‘lubiyati haqida fikr bildirdi.
“O‘yindan mamnunman. Yigitlar matonat va chinakam jamoaviy ruhni namoyon etishdi. Raqiblarimiz dunyoning eng kuchli jamoalaridan biri edi. Ammo so‘nggi daqiqalargacha qattiq kurash olib borildi. O‘yinda biz barcha o‘zbekistonliklarning qo‘llab-quvvatlashini his qildik. Jamoaga ishongan barchaga rahmat aytamiz!” deya Timur Kapadze so‘zlarini keltiradi jurnalist Nikita Makarenko o‘zining Telegram kanalida.
Ma’lumot uchun, O‘zbekiston Olimpiya terma jamoasi Ispaniya bilan o‘yinda 1:2 hisobida mag‘lubiyatga uchradi.
Uchrashuvning 28-daqiqasida ispanlar himoyachisi Pubill hisobni ochdi. Bo‘lim oxirida Eldor Shomurodov penaltini aniq amalga oshirib, hisobni tenglashtirdi. Qayd etib o‘tish lozim ushbu gol O‘zbekistonning Olimpiadalar tarixidagi ilk goli sifatida tarixdan joy oldi.
Ikkinchi bo‘limda esa ispanlar penalti ishlab oldi. Biroq Abduvohid Ne’matov ushbu penaltini qaytara oldi. 62-daqiqada esa aynan penaltidan unumli foydalana olmagan Serxio Gomes jamoasining ikkinchi goliga mualliflik qildi.
Uchrashuv yakuniga qadar shu hisob saqlanib qoldi va O‘zbekiston 1:2 hisobida imkoniyatni boy berdi.
Guruhning ikkinchi juftligida Misr va Dominikan Respublikasi jamoalari murosa yo‘lini (0:0) tanladi.
Izoh (0)