Элдор Шомуродов: Ҳали ҳеч нарса йўқотилмади. Олдинда икки муҳим ўйин кутиб турибди

Франциянинг Париж шаҳрида ёзги Олимпиада ўйинлари доирасида футбол мусобақаси старт олди.

C гуруҳининг илк турида Ўзбекистон U-23 терма жамоаси Испанияга қарши баҳс олиб борди ва 1:2 ҳисоби мағлуб бўлди.

Учрашувдан сўнг Ўзбекистоннинг Олимпиадалар тарихидаги илк голини урган Элдор Шомуродов ўз таассуротлари билан бўлишди.

“Рақибдан келиб чиқадиган бўлсак, биринчи ўйинда ёмон ўйнамадик деб ўйлайман. Испания хатоларни кечирмайдиган жамоа. 

Аввало, вазифамиз гуруҳдан чиқиш. Испанияга қарши ўйинда мағлубиятга учраган бўлсак-да, йигитлар яхши ўйин кўрсатди. Ҳали ҳеч нарса йўқотилмади. Олдинда икки муҳим ўйин кутиб турибди. Ўша ўйинларга тайёргарлик кўрамиз”, — дейди Элдор.

Ўзбекистон U-23 терма жамоаси 2-тур ўйинини 27 июль куни Мисрга қарши ўтказади. Илк турдан сўнг Испания 3 очко, Миср ва Доминикан 1 очкодан жамғарган бўлса, Ўзбекистон сўнгги поғонани банд этиб турибди.