Ўзбекистонда хорижий давлат сиёсий партияларини ташкил этишга йўл қўйилмаслиги белгиланди. Президент 2 июль куни имзолаган қонун билан “Сиёсий партиялар тўғрисида”ги қонунга бу борада тегишли қўшимча киритилди.
Унга кўра, Ўзбекистон ҳудудида хорижий давлатнинг сиёсий партиялари, уларнинг бўлинмаларини ташкил этиш ва фаолият олиб боришига йўл қўйилмайди.
Шунингдек, “Сиёсий партияларни молиялаштириш тўғрисида”ги қонунга сиёсий партияларнинг уставда назарда тутилган фаолиятини молиялаштириш учун ажратиладиган давлат маблағларининг йиллик ҳажмини кўпайтиришни, шунингдек, Қонунчилик палатасига охирги сайлов натижаларига асосан давлат маблағларини олиш ҳуқуқига эга бўладиган сиёсий партиялар ўртасида ушбу маблағларнинг тақсимлаш тартибини ўзгартиришни назарда тутувчи бандлар киритилмоқда.
Эндиликда сиёсий партияларнинг уставда назарда тутилган фаолиятини молиялаштириш учун ажратиладиган давлат маблағларининг йиллик ҳажми шу маблағларни ажратиш мўлжалланаётган йилдан олдинги йилнинг 1 сентябридаги ҳолатга кўра белгиланган БҲМнинг 2,5 фоизини Қонунчилик палатасига ўтказилган охирги сайловда сайловчилар рўйхатига киритилган фуқаролар сонига кўпайтмаси миқдорида шакллантирилади. Амалда бу миқдор 2 фоиз эди.
Бюджетдан ажратилган пулни Адлия вазирлиги қуйидаги тартибда тақсимлайди:
- 40 фоизи сиёсий партиялар ўртасида тенг миқдорда;
- 60 фоизи сиёсий партиялар ўртасида Қонунчилик палатасида олган депутатлик ўринларига мутаносиб равишда.
Қонунчилик палатаси депутатларининг сони ўзгарса давлат маблағлари қайта тақсимланмайди.
Маълумот учун, Ўзбекистонда 5 та сиёсий партия рўйхатга олинган: Ўзбекистон Халқ демократик партияси, Ўзбекистон “Адолат” социал демократик партияси, Ўзбекистон Миллий тикланиш демократик партияси, Ўзбекистон Либерал-демократик партияси, Ўзбекистон Экологик партияси.
Изоҳ (0)