Яқин Шарқда кучайиб бораётган кескинлик фонида 7 мамлакат раҳбарияти Ливанда бўлиб турган фуқароларига мурожаат йўллаб, мамлакатдан имкон қадар тез чиқиб кетишга чақирган. Бу ҳақда Ғарб нашрларига таяниб, Anadolu хабар берди.
Ливан ва Исроил ўртасида уруш юзага келиши эҳтимоли сабаб мамлакатлар хавфсизлик чораларини кучайтиришга чақирган. Европанинг кўплаб мамлакатларида Ливанга бормаслик тавсия қилинган.
Биринчи фавқулодда хабарни Саудия Арабистонининг Байрутдаги элчихонаси эълон қилган. Саудия расмийлари Ливанда бўлган фуқароларини “зудлик билан мамлакатдан чиқиб кетиш”га чақирган. Фавқулодда вазиятларда элчихона билан алоқада бўлиш зарурлиги таъкидланган.
Австралия ҳам ўз фуқароларига хавфсизлик вазиятининг ўта беқарорлигини таъкидлаб, Ливанга саёҳат қилмасликни “қатъий тавсия қилган”. Ташқи ишлар вазири Пенни Вонг Ливандаги австралияликларни тижорий рейслар мавжуд бўлганда зудлик билан ортга қайтишга чақирган.
Шунингдек, Нидерландия, Германия, Канада, Шимолий Македония ва Қувайт ўз фуқароларига фавқулодда чақириқлар юборган. “Минтақадаги хавфсизлик вазиятини ҳисобга олган ҳолда” имкон қадар тезроқ Ливандан кетиш сўралган.
Кўплаб таҳлилчилар Ғазо секторидаги ҳарбий ҳаракатлар якунлангач Исроил учун кейинги мўлжал Ливан бўлишини тахмин қилган. Исроил ҳарбий қўмитаси Ливан борасида махсус ҳарбий режа ишлаб чиққани, чегара ҳудудларини мустаҳкамлаш тадбирлари кетаётгани янги урушдан далолат экани айтилган.
Изоҳ (0)