Британия қироли Чарльз III нинг синглиси малика Анна отдан йиқилиши натижасида мияси чайқалиб, хотираси қисман йўқолди. Бу ҳақда Daily Telegraph нашри хабар берди.
Аниқлик киритилишича, малика Анна отда кечки сайр чоғида жароҳатланган: унинг бошидан олган жароҳатлари отнинг туёғи ёки калласидан зарба олганидан далолат берган. Бироқ маликанинг мияси чайқалгани сабабли воқеанинг аниқ тафсилотларини ҳозирча аниқлаб бўлмаган.
Шифокорларга кўра, Англия қиролининг 73 ёшли синглиси Бристол чеккасидаги Саутмед касалхонасига жойлаштирилган.
У аста-секинлик билан тузалмоқда, дея шифокорлар маълум қилган.
- Маълум бўлишича, малика Анна — от спорти ишқибози.
У бундан аввал ҳам кўп марта от билан боғлиқ жароҳатлар олган. 1964 йилда 14 ёшида от жилови Аннанинг бармоғини синдиришига бир бахя қолган. 1973 йилда у Киевда бўлиб ўтган чемпионатда отдан йиқилиб, мусобақани тарк этишга мажбур бўлган. Икки йил ўтгач, 1975 йил апрель ойида унинг Марди Грас оти сакраш пайтида уни Авон дарёсига улоқтирган.
1976 йилда малика отда энг жиддий жароҳат олган: Дорсетдаги пойгада отдан йиқилганида, жонивор уни эзиб ташлаган. Малика ҳушини йўқотган, умуртқа поғонаси синган. Кейинчалик у йиқилганини эслай олмаслигини айтган.
Изоҳ (0)