Британия қироли Чарльз III нинг кенжа ўғли — шаҳзода Гарри ҳозирда АҚШ резиденти эканлигини расман тасдиқлади, дея Euronews хабар берди.
Гаррига тегишли сайёҳлик компанияси шу ҳафта Буюк Британия ҳукуматига унинг кўчиб кетгани ва ҳозирда Қўшма Штатларда “доимий асосда” яшаётганини кўрсатадиган ҳужжатларни тақдим этган. Илгари Гарри фақат Британияни ўзининг “уйи” деб атаган.
Шу муносабат билан, унинг Британия монархининг давлат маслаҳатчиси сифатида фаолиятини давом эттириши масаласи номаълум қолмоқда, чунки қонунга кўра, бу фақат мамлакатда доимий яшовчиларга рухсат берилган.
Шаҳзоданинг янги яшаш жойи сифатида АҚШни расман тан олиши унинг Виндзорлардан узоқлашиб бораётганидан далолат бериши мумкин, — деб ёзади ушбу мавзуга ихтисослашган журналистлар.
2020 йилда Гарри ва унинг америкалик рафиқаси Меган Маркл қироллик оиласи аъзолари сифатидаги вазифаларидан воз кечиб, аввал Канадага, кейин эса АҚШга кўчиб ўтишган. Улар Жанубий Калифорнияга жойлашган. Сўнгги йилларда эр-хотин бир неча бор Британия монархияси ва унинг вакилларини танқид қилган.
Изоҳ (0)