Фарғона вилояти Қўштепа туманида қарздорнинг Tracker’и хатланиб, аукционда сотиб юборилди. Бу ҳақда МИБ ахборот хизмати “Дарё”га хабар берди.
Маълум қилинишича, Мажбурий ижро бюросининг Қўштепа тумани бўлими томонидан фуқаролик ишлари бўйича Марғилон туманлараро судининг қарздор Т.Д.дан банк фойдасига кредит қарзини ундириш, ундирувни Tracker’га қаратиш тўғрисидаги ижро ҳужжати бўлим иш юритувига келиб тушган ва ижро иши юритуви қўзғатилган.
Қарздор ижро ҳужжатида кўрсатилган қарздорликни 15 кунлик ихтиёрий муддатда бартараф қилиши тўғрисида огоҳлантирилишига қарамасдан, қарздорликни тўлашдан бўйин товлагани сабабли гаров мулки ҳисобланган автотранспорт воситасига нисбатан қидирув эълон қилинган.
Олиб борилган тезкор қидирув ишлар натижасида машина топилиб, давлат ижрочилари томонидан хатланган ва кимошди савдоларига чиқарилган. Бўлиб ўтган аукцион савдоларига кўра мазкур автотранспорт воситаси 203 300 000 сўмга сотиб олиниб, ғолиблик баённомасига асосан фуқаро Х.Д.га топширилган.
Шунингдек, кимошди савдоларидан тушган пул маблағлари ундирувчи банк ҳисобрақамларига ўтказиб берилиши таъминланди.
Изоҳ (0)