Гонгконгда 28 май куни Хитой ҳукуматига қарши тарғибот юритишда айбланган 6 нафар фуқаро ҳибсга олинди. Бу ҳақда BBC нашри хабар берди.
Манбада айтилишича, ҳибсга олинган фуқаролар ижтимоий тармоқларда Пекинга қарши “нафрат кайфияти уйғотувчи” материалларни эълон қилиб борган. Хитой ҳукуматининг яқин ўтмишдаги агрессив қарорлари ҳақида постлар жойлаган.
Беш нафар аёл ва бир эркак сешанба куни ҳибсга олингани маълум қилинган. Ҳибсга олинганлар орасида таниқли инсон ҳуқуқлари фаоли Чоу Ҳанг Тунг исмли шахс ҳам бор. У гуруҳга раҳбарлик қилгани айтилган.
Расмийларнинг таъкидлашича, гуруҳ 1989 йилнинг 4 июнида Пекиндаги Тянанмин майдонида юз берган қонли воқеалар ҳақида маълумотларни ижтимоий тармоқларда қайта тарқатишга уринган. Гонгконгда ушбу воқеаларда ҳалок бўлган талабаларни хотирлаш учун тадбир ўтказишга уринган.
Гуруҳ содир этган ҳаракати учун 7 йилгача озодликдан маҳрум қилиниши мумкин. Уларга айни дамда давлатга хиёнат айблови ҳам қўйилмоқда.
Маълумот ўрнида, Хитой пойтахтидаги Тянанмин майдонида 1989 йилнинг 4 июнида талабалар иштирокида намойиш бўлиб ўтган эди. Намойишчилар Хитой ҳукуматини сиёсий ислоҳотлар қилишга чақирган.
Намойишга жавобан Хитой ҳукумати Тянанмин майдонига танклар ва ҳарбий қисмлар киритган. Оқибатда минглаб намойишчилар ҳалок бўлган. Ушбу воқеалар ортидан кўплаб Ғарб давлатлари Хитойга қарши санкциялар киритган.
Тянанмин қурбонларини хотирлаш маросимлари Хитойда 2020 йилда тақиқланган. Бу тўғрисидаги ҳар қандай воқеани эсга олиш ва уни тарқатиш, жамоатчилик орасида ваҳима қўзғашга уриниш жиддий жавобгарликка тортилиши белгиланган.
Изоҳ (0)