Ҳиндистонда парламент қуйи палатасига 24 нафар мусулмон депутат сайланди. Бу ҳақда Ҳиндистон маҳаллий нашрларига таяниб, Anadolu нашри хабар берди.
Манбада айтилишича, 4 июнь куни қуйи палатага сайловлар натижаси эълон қилинган. Сайловлар жорий йилнинг 19 апрелида бошланиб, 1 июнь куни якунланган эди. Расмийлар депутатларни сайлаш жараёни 7 босқичда давом этганини маълум қилган.
Умумий сайловларда Ҳиндистон парламентининг қуйи палатаси Лок Сабҳага 24 нафар мусулмон депутат номзод сифатида кўрсатилган. 2019 йилдаги сайловларда номзодлар сони 26 нафар бўлгани айтилган.
Сайлов комиссияси эълон қилган якуний натижаларга кўра, ҳукмрон Бҳаратия Жаната партияси (БЖП) 543 нафар аъзога эга палатада 240 ўринни, асосий мухолифат “Ҳиндистон миллий конгресси” эса 99 ўринни банд қилган
БЖП энг кўп ўринни банд қилган бўлса-да, ҳокимиятга қайтиш учун унга камида 272 та ўрин талаб қилинади. Партия раҳбарлари бу мақсадга эришиш учун ҳамкор партиялар билан коалиция тузиш ҳаракатига тушган.
Мусулмонлар Ҳиндистондаги энг катта озчилик гуруҳи ҳисобланади. Мамлакатда 183 миллион мусулмон яшайди. Улар Ҳиндистон умумий аҳолисининг 14 фоизини ташкил қилади. Аммо ушбу жамоанинг парламентдаги улуши 5 фоиздан пастлигича қолмоқда.
Бу йилги сўровларда сиёсий партиялар мамлакат бўйлаб 78 нафар мусулмон депутат номзодини илгари сурган. 2019 йилда эса бу кўрсаткич 115 тани ташкил этган.
1952 йилда мустақил Ҳиндистонда ўтказилган биринчи сайловда фақат 11 нафар мусулмон депутат парламентга сайланган. Энг юқори статистика 1980 йилда кузатилиб, 49 мусулмон депутати Лок Сабҳа таркибига кирган. Бироқ ўшандан бери бу гуруҳ номзодлари сони қонунчилик палатасида доимий равишда камайиб бормоқда.
Изоҳ (0)