Фарғона вилояти Данғара туманида қарздорнинг қидирувдаги машинаси ЙТҲ натижасида носоз ҳолатда топилди. Бу ҳақда МИБ ахборот хизмати “Дарё”га хабар берди.
Маълум қилинишича, фуқаролик ишлари бўйича Қўқон туманлараро судининг январдаги ижро варақасига асосан қарздор Х.Қ.нинг бошқарувида бўлган Lacetti-2 автомашинасини хатлаш белгиланган.
У банкдан кредит олган ва уни ўз муддатида қайтармаган. Шу сабабли суд қарори асосида кредит қарздорлигини гаров мулкига қаратиш белгиланган. Ушбу ижро ҳужжати бюронинг Қўқон шаҳар бўлими иш юритувига мартда келиб тушган ва ижро иши қўзғатилган. Ижро ҳаракатлари давомида мазкур автотранспорт воситасига тақиқ ўрнатилган.
Бўлим давлат ижрочиси томонидан ижро ҳужжатида кўрсатилган манзилга бир неча маротаба бориб кўздан кечирилганда, автомашина йўқлиги аниқлангач, қидирув эълон қилинган.
Олиб борилган қидирув тадбирлари натижасига кўра, ушбу автомашина майда Данғара тумани, “Истиқлол” МФЙ ҳудудида жойлашган жарима майдончасидан ЙТҲ натижасида носоз ҳолатда топилиб, давлат ижрочиси томонидан хатланди ва ҳозирда аукцион савдоларига чиқариш чоралари кўрилмоқда.
Изоҳ (0)