Sobiq aktyor Sherzod Bin “33 savol” YouTube kanaliga bergan intervyusida AQSHdagi maktablar va tibbiyotdan ko‘ngli to‘lmasligi haqida gapirib berdi.
Amerika maktablari, Sherzod Saidaliyev nimalarga moslashdi-yu, nimalarga haligacha ko‘nikolmayotgani haqida.
— AQSH universitetlarida o‘qib, tahsil olayotgan talabalar uchun imkoniyatlar katta. Katta summalik 100 foizlik grandlarni qoplab berishadi. Bu tomoni zo‘r, ammo maktablari meni xavotirga soladi. Sababi o‘zbek mentalitetiga to‘g‘ri kelmaydigan darslari bor. Amerikadagi o‘zbeklarning eng og‘riqli nuqtasi — maktab mavzusi. Yaqinda Muhammadali Eshonqulov keldi, Filadelfiya shtatiga taklif qildik, vaziyatni ko‘rib, maktab ochish qaroriga kelganini aytdi. Hozir eng ko‘p o‘zbeklar Filadelfiyada. Nyu Yorkda ish ko‘p bo‘lishi mumkin, lekin u yerda yashash qimmat. Turk, arab, hind va pokistonliklarning maktablari bor, lekin o‘zbek maktablari ham bo‘lishi kerak, deb hisoblayman.
Sobiq aktyor AQSH tibbiyotining yaxshi va haligacha tushunolmayotgan taraflari haqida.
— Amerika tibbiyotiga haligacha yaxshi tushunolmayman. Umumiy katta shifoxonalari bor, ko‘p ishimiz tushadi. O‘zbekistonda dorixonalardan istalgan dorini xarid qilolasiz, bu yerda ko‘p dorilar faqat shifokor ko‘rsatmasi bilangina sotiladi, xatto shprits ham sotilmaydi. Kasallik boshlang‘ich darajada bo‘lsa, ko‘proq tabiiy usulda davolashadi, suv ichish kerakligini tinimsiz aytishadi. Lekin o‘ylaymanki, bizning doktorlarimiz kuchli. AQSHliklar sistemasi o‘chib qolsa, ishlay olmaydi, o‘zbek shifokorlar esa sham yoqib bo‘lsa ham, bemorni qutqarib qolishga harakat qilishadi. Lekin amerikaliklarning jarrohlik operatsiyalarini qilishiga qoyil qolmay iloj yo‘q.
Qaynotamni yuk mashinasi urib ketganida juda yaxshi operatsiya qilishdi, ko‘rmagandek bo‘lib ketganlar. Operatsiya qilingandan so‘ng uyingizga hisob varag‘i keladi, 10 yilga bo‘lib to‘lashingiz ham mumkin. Mabodo to‘lashga imkoningiz bo‘lmasa ham, uni davlat yopib yuboradi. Lekin bu keyinchalik kredit olishingizga taʼsir qiladi.
O‘zbekistonda tez tibbiy yordam xizmati uyingizga kelishi bepul, bu yerda 1200 dan 2000 dollargacha bo‘ladi. Ammo bu AQSH uchun u darajada katta xarajat emas. Farzand tug‘ilishi esa 10 ming AQSH dollaridan 20 minggacha ham bo‘ladi. Egizak bo‘lsa, undan ham narx oshadi. Amerikada terapiya yo‘q. Yaʼni O‘zbekistondagidek sanatoriylarni bu yerda ko‘rmadim. Imkoniyati yo‘qlar uchun fondlar bor, sahiy insonlar pul tashlashadi. AQSH aholisi sayohat uchun boshqa davlatlarga eng kam chiqadigan xalq ekan, chunki ularning o‘zida ko‘rishga arziydigan juda ko‘p joylari bor. Menga chet elliklarning doim kulib turishi yoqadi, tanimagan odami bo‘lsa ham, salomlashib tabassum bilan o‘tib ketishadi.
Green Card’ni qayerda to‘ldirish muhimmi?
— Green Card’ni qayerda to‘ldirishingizdan qatʼi nazar, to‘g‘ri to‘ldirish kerak. Meksika orqali noqonuniy kelishni esa umuman tavsiya qilmayman. Oilaviy kelayotganlarni eshitamiz, juda xatarli, deyishadi. AQSHga o‘tkazib qo‘yishni vaʼda qilib, avvaliga qanchadir pul bilan kelishib, keyin ikki-uch baravarini talab qilib, qiyin ahvollarga solib qo‘yishadi. Do‘stona maslahatim, kelgandan keyin to‘g‘ri yurish kerak. Biror jinoyat bilan qo‘lga tushib qolishsa, tamom. Bu yerda politsiya juda qattiq ishlaydi. Deport qilib yuborishsa-ku, mayli, lekin qamalgan odam chiqishi qiyin bo‘ladi.
Izoh (0)