Европа Иттифоқининг Афғонистондаги делегацияси мамлакатдаги сув тошқинидан жабрланганларга шошилинч инсонпарварлик ёрдами учун 200 минг евро маблағ ажратганини маълум қилди. Бу ҳақда Etilaatroz хабар берди.
Европа Иттифоқи вакилининг баёнотида айтилишича, бу пуллар селдан жабр кўрган вилоятларда, хусусан, Афғонистоннинг ғарбий, шимолий ва шимоли-шарқий ҳудудларидаги 28 минг кишига йўналтрилади.
Европа Иттифоқи расмийси бу маблағ соғлиқни сақлаш ва уй-жойга сарфланишини, сув тошқинидан жабрланганларга асосий кундалик эҳтиёжларини қондириш учун пул ёрдами берилишини айтган.
Европа Иттифоқи аввалроқ Афғонистондаги сув тошқини қурбонларига 400 минг евролик ёрдам беришини эълон қилган эди.
Эслатиб ўтамиз, жорий йилнинг баҳорида мамлакатнинг турли вилоятларида кучли ёмғир ёғиб, ҳалокатли сув тошқинлари содир бўлган. БМТ Жаҳон озиқ-овқат дастури Афғонистонда кучли мавсумий ёмғирлар оқибатида юзага келган сув тошқинлари оқибатида 300 дан ортиқ одам ҳалок бўлганини маълум қилган. Тошқиндан энг катта зарар ва талафотларни Бағлон, Ғор, Тахар, Фарёб ва Бадахшон вилоятлари кўрган.
Изоҳ (0)