Ўзбекистонда 2023 йилда давлат ташкилотлари 6,6 миллиард сўм пул сарфлаб 3,4 мингдан ортиқ смартфон сотиб олган. Бу бош вазирнинг асосий воситалар харидини тўхтатиб туриш ҳақидаги топшириғига зид.
“Кун.uz” нашрининг Иқтисодиёт ва молия вазирлиги ҳузуридаги Ғазначилик хизмати қўмитасининг таҳлилий ҳисоботига таяниб ёзишича, улар орасида энг сўнгги русумдаги қимматбаҳо iPhone 15 Pro Мах смартфонлари ҳам бор. Ўтган йили давлат бюджети дефицити фавқулодда ошиб кетган, бу дефицит, хусусан, ташқи қарзлар ҳисобига қопланган эди.
2023 йилда давлат ташкилотлари томонидан 3402 дона қимматбаҳо смартфон сотиб олиш учун 289 та ҳолатда жами 6 миллиард 637,8 миллион сўмлик шартномалар тузилиб, тўловлар амалга оширилган.
Қўмитанинг қайд этишича, бюджет ташкилотларининг бу харидлари бош вазирнинг 2023 йил 5 январдаги топшириғига зид равишда рўй берган. Бу топшириққа кўра, вазирлик ва идораларнинг чекланган сони (ташкилий тузилмаси) тасдиқлангунига қадар уларнинг асосий воситаларни харид қилиш билан боғлиқ харажатлари бюджет ва бюджетдан ташқари маблағлар ҳисобидан амалга оширилиши вақтинча тўхтатилиши керак эди.
Бироқ юқоридаги рақамлардан келиб чиқилса, ўтган йили давлат ташкилотлари ҳар бир харидда ўртача 12 та смартфонга буюртма берган.
Қўмитанинг ўрганишларига кўра:
- Қорақалпоғистон Республикасида 796 та уяли алоқа воситаси учун 62 ҳолатда 1 миллиард 483,3 миллион сўм;
- Жиззах вилоятида 658 та уяли алоқа воситаси учун 27 та ҳолатда 948,9 миллион сўм;
- Фарғона вилоятида 519 та уяли алоқа воситаси учун 30 та ҳолатда 581,9 миллион сўм маблағ сарфланган.
2024 йилнинг ўтган даврида эса маҳаллий бюджетлар ҳисобидан 301 та уяли алоқа воситаларини сотиб олиш учун 60 та ҳолатда жами 1 миллиард 362 миллион сўмлик шартномалар тузилиб, тўловлар амалга оширилган.
Хусусан, Фарғона вилоятида 146 та турли уяли алоқа воситалари учун 10 та ҳолатда 566,1 миллион сўм, Тошкент вилоятида 72 та уяли алоқа воситаси учун 7 та ҳолатда 193,1 миллион сўм ва Андижон вилоятида 14 та уяли алоқа воситаси учун 2 та ҳолатда 255 миллион сўм пул сарфланган. Мисол тариқасида, Андижон вилояти Олтинкўл тумани ҳокимлиги томонидан “Омад-имкон 21” МЧЖ билан 1 дона iPhone 15 Pro сотиб олиш учун 18,5 миллион сўмлик шартнома имзолангани келтириб ўтилган.
Ғазначилик қўмитаси тафтиш натижаларини бош вазир ўринбосари – иқтисодиёт ва молия вазири Жамшид Қўчқоровга тақдим этган. Вазиятни Молиявий назорат инспекцияси ўрганиши кераклиги бўйича таклиф билдирилган.
Аввалроқ Самарқанд вилояти прокуратураси 445 миллион сўмга 22 дона iPhone 14 Pro Max, Республика маънавият тарғибот маркази Тошкент вилояти бўлими эса 51 миллион сўмга иккита iPhone 15 Pro Мах харид қилгани ҳақида хабар берилганди.
Изоҳ (0)