O‘zbekistonda 2023-yilda davlat tashkilotlari 6,6 milliard so‘m pul sarflab 3,4 mingdan ortiq smartfon sotib olgan. Bu bosh vazirning asosiy vositalar xaridini to‘xtatib turish haqidagi topshirig‘iga zid.
“Kun.uz” nashrining Iqtisodiyot va moliya vazirligi huzuridagi G‘aznachilik xizmati qo‘mitasining tahliliy hisobotiga tayanib yozishicha, ular orasida eng so‘nggi rusumdagi qimmatbaho iPhone 15 Pro Max smartfonlari ham bor. O‘tgan yili davlat byudjeti defitsiti favqulodda oshib ketgan, bu defitsit, xususan, tashqi qarzlar hisobiga qoplangan edi.
2023-yilda davlat tashkilotlari tomonidan 3402 dona qimmatbaho smartfon sotib olish uchun 289 ta holatda jami 6 milliard 637,8 million so‘mlik shartnomalar tuzilib, to‘lovlar amalga oshirilgan.
Qo‘mitaning qayd etishicha, byudjet tashkilotlarining bu xaridlari bosh vazirning 2023-yil 5-yanvardagi topshirig‘iga zid ravishda ro‘y bergan. Bu topshiriqqa ko‘ra, vazirlik va idoralarning cheklangan soni (tashkiliy tuzilmasi) tasdiqlanguniga qadar ularning asosiy vositalarni xarid qilish bilan bog‘liq xarajatlari byudjet va byudjetdan tashqari mablag‘lar hisobidan amalga oshirilishi vaqtincha to‘xtatilishi kerak edi.
Biroq yuqoridagi raqamlardan kelib chiqilsa, o‘tgan yili davlat tashkilotlari har bir xaridda o‘rtacha 12 ta smartfonga buyurtma bergan.
Qo‘mitaning o‘rganishlariga ko‘ra:
- Qoraqalpog‘iston Respublikasida 796 ta uyali aloqa vositasi uchun 62 holatda 1 milliard 483,3 million so‘m;
- Jizzax viloyatida 658 ta uyali aloqa vositasi uchun 27 ta holatda 948,9 million so‘m;
- Farg‘ona viloyatida 519 ta uyali aloqa vositasi uchun 30 ta holatda 581,9 million so‘m mablag‘ sarflangan.
2024-yilning o‘tgan davrida esa mahalliy byudjetlar hisobidan 301 ta uyali aloqa vositalarini sotib olish uchun 60 ta holatda jami 1 milliard 362 million so‘mlik shartnomalar tuzilib, to‘lovlar amalga oshirilgan.
Xususan, Farg‘ona viloyatida 146 ta turli uyali aloqa vositalari uchun 10 ta holatda 566,1 million so‘m, Toshkent viloyatida 72 ta uyali aloqa vositasi uchun 7 ta holatda 193,1 million so‘m va Andijon viloyatida 14 ta uyali aloqa vositasi uchun 2 ta holatda 255 million so‘m pul sarflangan. Misol tariqasida, Andijon viloyati Oltinko‘l tumani hokimligi tomonidan “Omad-imkon 21” MCHJ bilan 1 dona iPhone 15 Pro sotib olish uchun 18,5 million so‘mlik shartnoma imzolangani keltirib o‘tilgan.
G‘aznachilik qo‘mitasi taftish natijalarini bosh vazir o‘rinbosari – iqtisodiyot va moliya vaziri Jamshid Qo‘chqorovga taqdim etgan. Vaziyatni Moliyaviy nazorat inspeksiyasi o‘rganishi kerakligi bo‘yicha taklif bildirilgan.
Avvalroq Samarqand viloyati prokuraturasi 445 million so‘mga 22 dona iPhone 14 Pro Max, Respublika maʼnaviyat targ‘ibot markazi Toshkent viloyati bo‘limi esa 51 million so‘mga ikkita iPhone 15 Pro Max xarid qilgani haqida xabar berilgandi.
Izoh (0)