Бугун, 18 май кечасида Ар-Риёдда бокс бўйича оғир вазнда мутлақ жаҳон чемпиони унвони учун британиялик Тайсон Фьюри ва украиналик Oлександр Усик ўртасидаги жанг бўлиб ўтади.
Жанг бугунгача бир неча бор қолдирилди. Жанг бўйича шартномалар ўтган йилнинг сентябрь ойида имзоланган. Аввалига бу тўқнашув 23 декабрда ўтказилиши кутилган эди, аммо бу сана охир-оқибат тасдиқланмади. Кейин жанг 17 февраль куни Ар-Риёдда бўлиб ўтиши белгиланди, аммо британиялик боскчи машғулотларда жароҳат олди ва жанг яна қолдирилди.
Оғир вазндаги “аср жанги”
Усик ва Фьюри сўнгги 25 йил ичида биринчи марта оғир вазн тоифасида мутлақ чемпионлик учун жанг қилади. Охирги марта Леннокс Льюис оғир вазн тоифасида мутлақ чемпион бўлган: британиялик Эвандер Холифилдни 1999 йилда мағлубиятга учратган ва учта асосий камарни — Жаҳон бокс ассоциацияси (WBA), Бутунжаҳон бокс кенгаши (WBC) ва Халқаро бокс федерацияси (IBF)ни қўлга киритган эди. 2007 йилдан Жаҳон бокс ташкилоти (WBO) унвони қўшилди.
Льюисдан кейин ака-ука Виталий ва Владимир Кличколар дивизионда устунлик қилишди, бироқ улар бир-бирига қарши жанг қилишни истамагани учун энг кучли жангчини аниқлашнинг иложи бўлмади.
2015 йилда Фьюри Владимир Кличкони мағлуб этиб, WBA, IBF ва WBO йўналишлари чемпионига айланди. Бироқ 2016 йилда британиялик боксчи психологик ва гиёҳванд моддалар билан боғлиқ муаммолар туфайли унвонларидан воз кечди ва вақтинча истеъфога чиқди. Фьюри 2018 йилнинг июнь ойида рингга қайтди.
Аста-секин британиялик Энтони Жошуа WBA, IBF ва WBO камарларини тўплади. 2021 йил сентябрьида Усик Жошуани мағлуб этди ва WBA, IBF, WBO ва IBO бўйича бокс бўйича янги жаҳон чемпионига айланди, Фьюри эса 2020 йил февралида Деонтей Уайлдерни мағлуб этиб, WBC чемпионига айланди. Энди Усик ва Фьюри оғир дивизионда мутлақ чемпионлик учун курашда тўқнаш келади.
Боксчилар қанча гонорар олишади?
Промоутер Боб Арум октябрь ойида Фьюри ва Усикнинг ҳамёнлари 100 миллион долларга тўлиши ҳақида айтиб ўтган эди: “Агар сиз Фьюрига жанг учун атиги 100 миллион доллар ишлаб олишини айтсангиз, у жуда ғазабланган бўларди. Мен аниқ миқдорни айтмайман, лекин бу миқдор кўпроқ эканлигини тасдиқлайман”.
Кўплаб инсайдерлар бу миқдорни пастроқ эканлигини таъкидламоқда. TalkBОХING подкастида бокс шарҳловчиси Саймон Жорданнинг сўзларига кўра, Фьюрининг гонорари 90 миллион фунт стерлинг (тахминан 115 миллион доллар) бўлиши мумкин, Усик эса 50 миллион фунт стерлинг (60 миллион доллар) ишлаб топади.
Тhе Story Insider маълумотларига кўра, Фьюри ва Усикнинг кафолатланган тўловлари 20 миллион ва 8 миллион долларни ташкил этади ва улар асосий даромадни PPV (кўриш учун тўлов, пуллик трансляциялар савдоси) дан олади. Даромадлар эса қуйидагича тақсимланади. Фьюри фойдасига 65%, Усикка эса 35%. Боксчилар бу тўловларни чипталар сотуви, трансляция ва бошқа шартномалардан қандай бўлишидан қатъий назар қўлга киритади.
Ҳозирда энг кўп даромад келтирувчи бокс жанги 2015 йилнинг 2 май куни бўлиб ўтган Флойд Мейвезер ва Менни Пакяо ўртасидаги жанг ҳисобланади. Турли ҳисоб-китобларга кўра, ушбу жангдан тушган умумий даромад тахминан 500 миллион долларни ташкил этган. Трансляцилар эса 4, 6 миллион кишига сотилган.
Боксчилар қандай кайфиятда етиб келди?
Усик 27 август куни британиялик Даниэль Дюбуани мағлуб этиб, жаҳон чемпионлигини ҳимоя қилди. Украиналик боксчи жангда ишончли тарзда ғалабага олиб чиқди. Саккизинчи раундда у рақибини нокдаунга туширишга муваффақ бўлди, шундан сўнг Дюбуа жангни давом эттира олмади.
Усик ҳозиргача 21 та ғалабага эришган ва профессионал рингда бирорта ҳам мағлубият аламини тотиб кўрмаган.
Фьюри сўнгги жангини 29-октябрь куни ўтказган: у собиқ UFC чемпиони Френсис Нганнуни очколар ҳисобида ғалаба қозонди. Жанг ўн раунд давом этди. Учинчи раундда Нганну Фьюрини хук зарбаси билан нокдаунга учратишга ҳам эришди.
35 ёшли Фьюри профессионал рингда 35 та жанг ўтказиб, 34 та ғалабага эришган, 2018 йилда америкалик Деонтей Уайлдер билан жангдаги дуранг фаолиятида ягоналигича қолмоқда.
Ушбу жанг бугун, 18 май кечасида бўлиб ўтади.
Турнир доирасида қуйидаги жанглар ўтказилади:
- Маирис Бриэдис (28-2) – Жай Опетая (24-0);
- Жо Кордина (17-0) – Энтони Какаче (21-1);
- Сергей Ковалев (35-4-1) – Робин Сафар (16-0);
- Марк Чемберлен (15-0) – Жошуа Олувасеун Ваҳаб (23-1);
- Фрэнк Санчес (24-0) – Агит Кабаел (24-0);
- Даниэль Лапин (9-0) – Октавио Пудивитр (9-1).
Жой — Саудия Арабистонининг Кингдом Арена стадиони. Айнан шу стадионда Фьюри Нганнуга қарши рингга кўтарилганди ва ғалаба қозонган эди. Шунингдек, Дмитрий Бивол, Энтони Жошуа ва Деонтей Уайлдер иштирокидаги турнир бўлиб ўтган.
Жангни Ўзбекистоннинг ҳеч бир канали трансляция қилмайди. ESPN+ да жонли томоша қилиш мумкин бўлади.
Изоҳ (0)