Супер оғир вазн тоифасида WBA Супер, IBF, WBO ва IBO камарлари соҳиби Олександр Усик ва WBC чемпиони Тайсон Фьюри мутлақ жаҳон чемпионлиги учун жанг қилади.
Орадан 25 йил ўтиб, оғир вазн тоифасида мутлақ жаҳон чемпиони аниқланади. 1999 йилда худди шундай жангда Леннокс Льюис Эвандер Ҳолифилдни мағлуб этганди.
Фьюри ва Усик ўртасидаги жанг 18 май куни Саудия Арабистонида бўлиб ўтади. Аслида шбу жанг 17 февраль санасида бўлиб ўтиши лозим эди. Бироқ, Тайсон спарринг вақтида қошидан олган жароҳат туфайли сана ўзгарган.
35 ёшли Тайсон Фьюри ўзининг сўнгги жангини ўтган йилнинг октябрь ойида камерунлик MMA жангчиси, собиқ UFC чемпиони Френсис Нганнуга қарши ўтказиб, ҳакамларнинг қарори билан ғалаба қозонган эди. Украиналик Олександр Усик эса ўтган йилнинг августида британиялик Даниэль Дюбуани 9-раундда техник нокаутга учратиб, ўз камарини мажбурий даъвогардан ҳимоя қилганди.
18 май куни бўлиб ўтадиган турнир бўйича яна қандай маълумотлар бор?
Турнир доирасида қуйидаги жанглар ўтказилади.
- Маирис Бриэдис (28-2) – Жай Опетая (24-0);
- Жо Кордина (17-0) – Энтони Какаче (21-1);
- Сергей Ковалев (35-4-1) – Робин Сафар (16-0);
- Марк Чемберлен (15-0) – Жошуа Олувасеун Ваҳаб (23-1);
- Фрэнк Санчес (24-0) – Агит Кабаел (24-0);
- Даниэль Лапин (9-0) – Октавио Пудивитр (9-1).
Жой — Саудия Арабистонининг Кингдом Арена стадиони. Айнан шу стадионда Фьюри Нганнуга қарши рингга кўтарилганди ва ғалаба қозонган эди. Шунингдек, Дмитрий Бивол, Энтони Жошуа ва Деонтей Уайлдер иштирокидаги турнир бўлиб ўтган.
Жангни Ўзбекистоннинг ҳеч бир канали трансляция қилмайди. ESPN+ да жонли томоша қилиш мумкин бўлади.
Изоҳ (0)