Жорий йилнинг январь–март ойларида Ўзбекистонда никоҳдан ажралган оилаларнинг 46,2 фоизи фарзандсиз, 53,8 фоизида бир нечтагача фарзанди бўлган. Бу ҳақда Статистика агентлиги маълум қилди.
Мамлакатда 2024 йил I чорагида никоҳдан ажралишлар сони 11500 тани ташкил этиб, 2023 йилнинг мос давридагига қараганда 1500 тага камайди. Ажралишларнинг 7100 таси шаҳар жойларида (61,4 фоиз), 4400 таси қишлоқ жойларида (38,6 фоиз) қайд этилган.
Уч ой давомида 1 нафар фарзанд билан 3402 та (29,6 фоиз), 2 ва ундан ортиқ бола билан 2778 та (24,2 фоиз), фарзандсиз 5 301 та (46,2 фоиз) оила никоҳдан ажралган.
Тошкент шаҳри (1504 та), Тошкент (1189 та), Андижон (1178 та) ҳамда Фарғона (1188 та) вилоятларида энг кўп, Навоий (310 та) ва Сирдарё (390 та) вилоятларида энг кам никоҳдан ажралишлар бўлган.
Никоҳдан ажрашганларнинг ўртача ёши эркаклар учун 37,4 ёшни, аёлларда 32,5 ёшни ташкил этган. Энг кўп кикоҳдан ажрашганлар 35 ёшгача бўлган аёллар экани маълум қилинган.
Умуман олганда, 2024 йилгача бўлган уч йиллик даврда никоҳдан ажралишлар сони ортиб борди. Масалан, 2020 йилда 28 200 та оила никоҳдан ажрашган бўлса, 2021 йилда бу рақам 39 300 тани, 2022 йилда 48 700 тани, 2023 йилда максимумга етиб, 49 200 тани ташкил этган.
Изоҳ (0)