“Охирги авлод” (Letzte Generation) радикал ҳаракатининг экология фаоллари Мюнхен аэропортига кириб, у ерда навбатдаги норозилик намойишини уюштиришди.
Бу ҳақда DPA агентлиги маълум қилди.
Хабар қилинишича, акция натижасида ҳаво бандаргоҳи қисқа муддатга ёпилган.
“Аэропорт хавфсизлик нуқтайи назаридан ёпилган, чунки иқлим фаоллари учиш-қўниш йўлагига ёпишган”, — деди аэропорт вакили.
Аэропортга учиб келган самолётлар бошқа аэропортларга йўналтирилди.
Айни пайтда воқеа жойида кўплаб ҳуқуқ-тартибот идоралари ходимлари ишламоқда. Аэропорт вакили таъкидлаганидек, ҳозирда иккита учиш-қўниш йўлагидан бири очиқ, бироқ парвозлар кечикиши кутилмоқда.
Атроф-муҳит фаоллари норозилик акциясини Мюнхен аэропорти учун энг гавжум вақтлардан бирида уюштиришди. Аэропортда жумадан якшанбагача жами 350 мингга яқин йўловчи фойдаланиши кутилмоқда. Бу вақт ичида Мюнхен аэропорти 2860 та рейсни амалга оширишни режалаштирган.
Изоҳ (0)