Швециялик фаол Грета Тунберг ва Auroras ёшлар экологик ҳаракатининг 600 дан ортиқ аъзолари Швеция ҳукуматининг иқлим бўйича сиёсатидан норози бўлиб, мамлакатга қарши даъво киритди. Бу ҳақда Тунберг Twitter’да маълум қилди.
https://twitter.com/GretaThunberg/status/1596132582114328583
Даъвода айтилишича, Швециянинг иқлим бўйича сиёсати унинг конституциясига, шунингдек, Инсон ҳуқуқлари бўйича Европа конвенциясига зиддир.
«Швеция давлати жорий ва келажак авлодлар учун қулай атроф-муҳит яратишга олиб борувчи барқарор тараққиётга кўмаклашиш бўйича конституциявий талабни бажармаяпти», — дейилади баёнотда.
Ўз талабларини қўллаб-қувватлаш учун фаоллар норозилик юришини ташкил қилди. Унинг суратларини Тунберг ижтимоий тармоқларда бўлишди.
«Бизда иқлимий ва экологик инқирозлар оқибатларидан узоқ муддатли ҳимояни таъминловчи қонунлар йўқ, лекин биз ўзгаришимиз ва инқирозга юз тутганимиздан хабардорликни оширишимиз учун қўл остимиздаги усуллардан фойдаланиб, бор имкониятимизни ишга солишимиз керак», — деди Тунберг Швециянинг Dagen Nyheter газетасига берган интервьюсида.
Bloomberg қайд этишича, экофаоллар томонидан бундай даъволар бошқа мамлакатлар ҳукуматларига қарши ҳам берилган. Хусусан, 2019 йилда Нидерландияда суд ҳукумат глобал исиш оқибатларини юмшатиш учун чоралар кўриши шарт, деган қарор чиқарганди.
2017 йилда Швеция иқлим ҳақида қонун қабул қилган бўлиб, у ҳукуматдан 2045 йилгача иссиқхона газлари ажралиб чиқишини қисқартириш ва углерод нейтраллигига эришишни талаб қилади.
Мавзуга доир:
- Экофаол Грета Тунберг БМТнинг Иқлим ўзгариши бўйича саммити ташкилотчиларини ёлғончиликда айблади
- АҚШ, Британия, Австралия: иқлим бўйича жаҳоннинг энг йирик конференцияси олдидан дунё давлатларида ўтказилган норозилик намойишлари — суратларда
- Буюк Британияда экофаол Грета Тунбергнинг ҳайкали ўрнатилди
Изоҳ (0)