БААнинг Дубай шаҳридаги халқаро аэропортида 16 апрель куни Uzbekistan Airways авиакомпаниясининг Тошкентга учишга ҳозирлик кўраётган самолётида икки йўловчи ўртасида жанжал содир бўлди. Бу ҳақда Транспорт ва туризм объектларида хавфсизлик департаменти хабар берди.
Маълум қилинишича, йўловчилар HY334-сонли рейсга чиқиб ўтирган, эшиклар ёпилган ва трап олинган. Ноқулай об-ҳаво туфайли парвоз кечиктирилган.
Йўловчилардан 1979 йилда туғилган Ўзбекистон фуқароси (аёл) экипаж аъзоларининг бир неча бор тинчлантиришига қарамай, 200 нафардан ортиқ йўловчидан иборат жамоат жойида уятли сўзлар билан, баланд товушда сўкиниб, жамиятда юриш-туриш қоидаларини қасддан менсимай, шовқин кўтариб, самолёт эшигини очишни ва ундан чиқишни айтиб, безорилик ҳаракатларини амалга оширган.
Аёл уни тинчлантиришга ҳаракат қилган 1982 йилда туғилган йўловчи билан ҳам ўзаро жанжаллашиб, безорилик ҳаракатларини содир этган.
Шундан сўнг фавқулодда трап техникалари жалб қилинган ҳолда самолёт эшиклари очилган ва Дубай аэропортининг ҳуқуқни муҳофаза қилувчи орган ходимлари жанжаллашган фуқароларни самолётдан тушириб қолдирган.
Ушбу ҳолат оқибатида рейс яна кечиктирилган ва бошқа авиарейсларнинг ҳам белгиланган жадвал вақтлари ўзгартирилган. Оқибатда Uzbekistan Airways’га 5037 доллар моддий зарар келиб чиққан, дейилади хабарда.
Ҳозирда ҳолат юзасидан департамент ходимлари томонидан терговга қадар текширув ишлари олиб борилиб, безорилик ҳаракатини содир қилган шахслардан моддий зарар тўлиқ ундирилган. Уларга нисбатан маъмурий жавобгарлик масаласини ҳал қилиш учун ҳужжатлар судга юборилган.
Изоҳ (0)