BAAning Dubay shahridagi xalqaro aeroportida 16-aprel kuni Uzbekistan Airways aviakompaniyasining Toshkentga uchishga hozirlik ko‘rayotgan samolyotida ikki yo‘lovchi o‘rtasida janjal sodir bo‘ldi. Bu haqda Transport va turizm obyektlarida xavfsizlik departamenti xabar berdi.
Maʼlum qilinishicha, yo‘lovchilar HY334-sonli reysga chiqib o‘tirgan, eshiklar yopilgan va trap olingan. Noqulay ob-havo tufayli parvoz kechiktirilgan.
Yo‘lovchilardan 1979-yilda tug‘ilgan O‘zbekiston fuqarosi (ayol) ekipaj aʼzolarining bir necha bor tinchlantirishiga qaramay, 200 nafardan ortiq yo‘lovchidan iborat jamoat joyida uyatli so‘zlar bilan, baland tovushda so‘kinib, jamiyatda yurish-turish qoidalarini qasddan mensimay, shovqin ko‘tarib, samolyot eshigini ochishni va undan chiqishni aytib, bezorilik harakatlarini amalga oshirgan.
Ayol uni tinchlantirishga harakat qilgan 1982-yilda tug‘ilgan yo‘lovchi bilan ham o‘zaro janjallashib, bezorilik harakatlarini sodir etgan.
Shundan so‘ng favqulodda trap texnikalari jalb qilingan holda samolyot eshiklari ochilgan va Dubay aeroportining huquqni muhofaza qiluvchi organ xodimlari janjallashgan fuqarolarni samolyotdan tushirib qoldirgan.
Ushbu holat oqibatida reys yana kechiktirilgan va boshqa aviareyslarning ham belgilangan jadval vaqtlari o‘zgartirilgan. Oqibatda Uzbekistan Airways’ga 5037 dollar moddiy zarar kelib chiqqan, deyiladi xabarda.
Hozirda holat yuzasidan departament xodimlari tomonidan tergovga qadar tekshiruv ishlari olib borilib, bezorilik harakatini sodir qilgan shaxslardan moddiy zarar to‘liq undirilgan. Ularga nisbatan maʼmuriy javobgarlik masalasini hal qilish uchun hujjatlar sudga yuborilgan.
Izoh (0)