Исроил аскарлари операция ўтказаётган Ғазонинг Рафаҳ ҳудудидан 110 мингдан ортиқ фаластинлик хавфсиз ҳудудларга қочиб кетган. Бу ҳақда Anadolu нашри Яқин Шарқ манбаларига асосланиб, хабар берди.
Манбада айтилишича, биргина 10 май куни Рафаҳда оммавий кўчиш юз берган. Ушбу хабарни БМТнинг фаластинлик қочқинлар бўйича агентлиги (UNRWA) ҳан тасдиқлаган.
Агентлик оммавий кўчишлар оғир оқибатларга олиб келиши мумкинлигидан огоҳлантирган. Аҳолини кўчиришга уринаётган Исроил хатти-ҳаракатларини қаттиқ танқид остига олган.
“Ғазо секторида ҳозир ҳеч қандай хавфсиз жой мавжуд эмас. Яшаш шароитлари даҳшатли”, — дейилади UNRWA баёнотида.
Сўнгги 24 соатда Рафаҳда ҳаво ҳужумлари кучайгани билдирилган. Исроил аскарлари фаластинликларни мажбурий кўчира бошлаган. Ҳужум остида деб эълон қилинган манзиллардан эса аҳоли вакиллари оммавий қоча бошлаган.
6 май куни Исроил кучлари раҳбарияти шарқий Рафаҳдаги фаластинликларни эвакуация қилиш тўғрисида буйруқ чиқарган эди. Шу билан 1,5 миллион нафар кўчирилган фаластинликлар яшайдиган шаҳарга ҳужуми бошланиб кетди.
Орадан бир кун ўтиб Исроил кучлари Ғазо ва Мисрни боғловчи Рафаҳ чегара пункти назоратини қўлга киритганини маълум қилган. Шундан сўнг ўтказув пункти барча транспорт воситалари учун, жумладан гуманитар карвонлар учун ҳам ёпиб қўйилган.
Фаластин Соғлиқни сақлаш вазирлиги маълумотларига кўра, Исроилнинг Ғазо секторига ҳужуми бошланганидан бери камида 34,900 нафар фаластинлик ҳалок бўлган. Уларнинг 70 фоизга яқини аёллар ва болалардир. Жароҳатланганлар сони 78,500 нафарга яқинлашган. Шунингдек, расмийлар 10 минг нафарга яқин фаластинлик бедарак йўқолганини ҳам маълум қилган.
Изоҳ (0)