Макрон француз қўшинларини Украинага юбориш шартларини айтди 

Франция президенти Эммануэл Макрон Украинага Ғарб қуруқликдаги қўшинларини Россияни тийиб туриш ҳамда мавзу бўйича муҳокамаларни жонлантириш воситаси сифатида юбориш имкониятини тасдиқлади. Бу ҳақда The Economist хабар берди.

Агар руслар фронт чизиғидан ўтганида, Украинадан бу масала юзасидан сўров бўлганида, биз қонуний равишда қўшин юбориш тўғрисида ўйлашимиз мумкин эди, — деди у.

Франция президенти, шунингдек, иттифоқчиларни бундай сценарийни истисно қилмасликка чақирган, чунки бу Европа Иттифоқи хавфсизлиги ва ҳокимияти учун “асосий шарт” бўлиб хизмат қилади. 

Макроннинг таъкидлашича, Франция Африка давлатлари раҳбарлари ёрдам сўраганида аллақачон ўз қўшинларини юборган.

Аввалроқ Макрон Европа учун Россиянинг мағлубияти зарурлигини таъкидлаган. У Украинага француз қўшинларини юборишни истисно қилмаган эди. Кейинчалик у Россия армиясига қарши қуруқликдаги операция ўтказишни ҳам истисно этмаган.

Макроннинг сўзлари Россияда ҳам, Ғарб давлатларида ҳам танқидларга учраган. Хусусан, НАТО раҳбарияти Киевга қўшин юбориш режаси йўқлигини маълум қилган. Politicoъга кўра, Франция Украинага потенциал ҳарбий қўшин юборишга тайёр давлатлар коалициясини тузмоқда. Мазкур ташаббус Литва, Латвия ва Эстония томонидан қўллаб-қувватланган. Украина президенти Владимир Зеленский мамлакат ҳудудида хорижий қўшинлар керак эмаслигини айтган.

Кремль Украинада Ғарб ҳарбийлари пайдо бўлган тақдирда НАТО ва Россия ўртасида тўғридан тўғри можаро юзага келиши мумкинлигини айтган.