Америка Қўшма Штатларининг Небраска ва Айовa штатлари кучли торнадо гирдобида қолди. Бу ҳақда маҳаллий нашрларга таяниб, CNN хабар берди.
Манбада айтилишича, торнадолар штатнинг катта ҳудудини вайрон қилган. Тезкор қутқарув бригадалари вайрон бўлган иншоот ва бинолар остида тирик қолганларни изламоқда.
Олдинроқ мутахассислар торнадолар Небраска ва Айовa штатларига катта зарар келтиришини маълум қилганди. Табиий офат 27 апрель куни кучайиб, Мичиган ва Техас штатларигача бориши айтилган.
Небраска штатининг Oмаҳа шаҳридаги Элкорн ҳудуди ҳозирда энг кўп зарар кўрган ҳудудлардан бири бўлиб қолмоқда. Жума куни тушдан кейин содир бўлган торнадо уйларни текислаб ташлаган, шаҳарнинг қатор объектларини вайронага айлантирган. Ҳудуддаги қутқарувчилар қамалиб қолган ёки жароҳатланганларни қидирмоқда.
Айовa штатидаги Минден шаҳрида ҳам улкан вайронкорликлар кузатилган. Ҳудуд деярли тўла вайрон бўлган.
Оғир иқлим ҳодисаси якшанбагача давом этиши кутилмоқда. 27 апрель тунида торнадолар Техасдан Канзасга, жумладан Даллас, Остин, Оклаҳома Сити, Тулза, Канзас Сити ва Вичитага тарқалиши эълон қилинган.
Айовa штатининг Поттаватами округидаги тўрт фуқаро торнадо олиб келган вайронгарчилик оқибатида жароҳатланган. Округнинг ўзида 120 га яқин уй ва корхона вайрон бўлган. Ҳудудда умумий 90 000 га яқин аҳоли яшаши хабар қилинган.
Небраска штатининг Шелби ва Дуглас округларидаги аҳоли фавқулодда вазият туфайли ташқи дунёдан узилиб қолган. Расмийлар ҳудудга тезкор қутқарув гуруҳлар жўнатилишини айтган.
Изоҳ (0)